Nyege Nyege, iserukiramuco ririkoroza muri Uganda ryagarutse mu isura nshya

Nyege Nyege ni rimwe mu maserukiramuco akomeye muri Uganda, rimaze imyaka myinshi rihuza abahanzi, abakora mu nganda ndangamuco ndetse n’abakunzi b’imyidagaduro baturuka mu bice bitandukanye by’Afurika no hanze yayo.

Kuri iyi nshuro, abategura iri serukiramuco bavuga ko bashaka kuritandukanya n’uko ryari risanzwe rimenyerewe. Bazakorana n’umuryango wa sinema uzwi nka Wakaliwood, uzwiho gukora filime mu buryo bwigenga muri Uganda, kugira ngo ibice bimwe bya Kalagala Falls bihindurwe ahantu hafatirwa amashusho ya filime nshya.

Ibi bivuze ko abazitabira Nyege Nyege batazaba bareba ibitaramo gusa, ahubwo bamwe bazagira amahirwe yo kugera mu bikorwa byo gutunganya filime bizajya bibera muri iri serukiramuco.

Iyi nshuro yiswe “Wakaliwood Edition”, mu rwego rwo kugaragaza ubufatanye hagati ya Nyege Nyege na Wakaliwood.

Abategura bavuga ko ibyo bikorwa bizahuza umuziki, sinema, ikinamico, ubuhanzi n’ibindi bikorwa ndangamuco, mu gihe umugezi wa Nili n’ahazengurutse Kalagala Falls bizaba ari igice cy’iyi nyubako idasanzwe y’imyidagaduro.

Umwe mu bashinze Nyege Nyege, Derek Debru, yavuze ko nyuma yo gukora izindi nshuro 10, bashatse gutangiza igice gishya cy’iri serukiramuco hakorwa ikintu cyihariye cyashoboraga gukorerwa muri Uganda gusa.

Yavuze ko Nyege Nyege na Wakaliwood bihuriye ku muco wo gukora ibintu bifashishije ubushobozi buhari, kubaka umwihariko wabo no kuwugeza ku bantu bari hirya no hino ku Isi.

Mu gihe cy’iminsi ine, abahanzi barenga 200 bazigaragaza mu byiciro birindwi by’iri serukiramuco.

Abo bahanzi bazaturuka muri Uganda, mu bihugu byo muri Afurika y’Iburasirazuba, ahandi muri Afurika ndetse no hanze yayo.

Imiziki izumvikana muri iri serukiramuco izaba itandukanye, harimo umuziki w’abahanzi ku giti cyabo, amatsinda acuranga imbonankubone, umuziki wo mu tubyiniro, imiziki igerageza uburyo bushya ndetse n’umuziki gakondo.

Hazagaruka kandi igice cyamamaye cya Dub & Reggae, mu gihe u Rwanda na Kenya bizagira ibice byabyo byihariye.

Nyege Nyege izakira kandi Boiler Room, ibikorwa bizwi cyane mu muziki wo kubyina.

Ku rubyiniro rw’ingenzi, Uganda izahagararirwa n’abahanzi barimo King Saha, Sheila Gashumba, Etania, Linus na Abeeka Band, bari mu mazina ya mbere yatangajwe.

Uretse umuziki, hazaba kandi ibikorwa by’urwenya, imideli, ubuhanzi bugaragara ndetse n’ibindi bikorwa bituma abazitabira bataba abarebera gusa, ahubwo bakagira uruhare mu byabereye muri iri serukiramuco.

Nyege Nyege y’uyu mwaka ntizibanda ku myidagaduro gusa. Abategura barashaka ko iba urubuga rwo kumenyekanisha Uganda nk’igihugu gifite ubukerarugendo n’inganda ndangamuco bifite ubushobozi bwo gukurura abantu baturutse hirya no hino ku Isi.

Ku bufatanye na Explore Uganda, abazitabira iri serukiramuco bazahabwa uburyo bwo gukomeza gusura Uganda na nyuma y’ibitaramo.

Hazategurwa gahunda zizahuza abashyitsi n’ahantu nyaburanga, ibikorwa by’umuco ndetse n’imyidagaduro ishingiye ku bukerarugendo n’ibikorwa byo kwidagadura.

Arthur Lwamufu wo mu rwego rw’ubukerarugendo muri Uganda yavuze ko Nyege Nyege ari urubuga rukomeye rwo kumenyekanisha ubukerarugendo, umuco n’ubushobozi bw’abakora mu nganda ndangamuco za Uganda.

Muri iri serukiramuco hazaba kandi igikorwa cyihariye kijyanye n’imikino ya AFCON, bityo umupira w’amaguru ukaziyongera ku bikorwa by’umuziki, sinema, ubuhanzi n’ubukerarugendo.

Abategura kandi batangaje ko hari impinduka bakoze mu myiteguro y’ahazabera iri serukiramuco, zirimo kunoza uburyo bwo kwinjira, aho imodoka ziparika, uko abantu bazagenda ndetse n’aho bazacumbika.

Hashyizweho amahema ashobora kuzakira abantu bagera ku 1,000, mu gihe Adrift River Club izatanga ahandi ho gucumbika ndetse n’ibindi bikorwa byo kwidagadura.

Mbere y’uko Nyege Nyege itangira, kuva ku wa 17 kugeza ku wa 19 Ugushyingo, hazaba African Electronic Music Conference, izahuza abahanzi, ibigo bitunganya umuziki, abategura ibitaramo ndetse n’imiryango ikora mu bijyanye n’umuco.

Iyi nama izibanda ku biganiro ku cyerekezo cy’inganda z’umuziki wa Afurika, cyane cyane ku bijyanye n’umuziki n’uburyo abawukora bashobora kurushaho kuwuteza imbere.

Nyuma y’imyaka irenga 10 imenyekanisha umuziki n’umuco bya Uganda, Nyege Nyege igiye gukomeza kwagura ibyo izwiho.

Ubu umuziki uracyari wo shingiro ry’iri serukiramuco, ariko kuri iyi nshuro uzahuzwa n’umwanya na sinema, ubukerarugendo, imideli, ikinamico n’ubundi buhanzi.

Ku bazitabira, Nyege Nyege 2026 izaba atari ugutembera kureba abahanzi gusa, ahubwo izaba n’umwanya wo kwinjira mu bikorwa bitandukanye birimo ikorwa rya filime, gusura ahantu nyaburanga, kumva imiziki itandukanye no guhura n’abantu baturuka mu bihugu bitandukanye.

Iserukiramuco rizabera ahitwa Kalagala Falls muri Uganda, kuva ku wa 19 kugeza ku wa 22 Ugushyingo 2026, mu gihe iminsi ibanziriza iri serukiramuco izaba yaranzwe n’inama n’ibiganiro ku iterambere ry’inganda ndangamuco za Afurika.

Iserukiramuco ‘Nyege Nyege’ rigiye kuba ku nshuro ya 11, aho rizabera ahiwa Kalagala Falls muri Uganda, ihuze umuziki, sinema, ubuhanzi, imideli n’ubukerarugendo kuva ku wa 19 kugeza ku wa 22 Ugushyingo 2026