MTN Rwanda yamuritse Miss Baza ifasha mu gusubiza ibibazo bitandukanye

MTN Rwanda yamuritse ku mugaragaro Miss Baza kuri uyu wa Kane tariki ya 29 Ukwakira 2026, gusa yari imaze igihe ikora. Miss Baza yamuritswe mu muhango witabiriwe n'abarimo Minisitiri w'Ikoranabuhanga na Inovasiyo, Ingabire Paula  .

Miss Baza si chatbot isanzwe. Ni ikimenyetso cy’uko ikoranabuhanga rishobora kuba rinyuranye, rifite isura y’Afurika, kandi riharanira ko buri Munyarwanda agira uruhare mu isi y’ikoranabuhanga.

Miss Baza azajya afasha abaturage kubona serivisi za Leta, kugenzura ubutaka, gushakisha amashoramari n’amakuru ku bukerarugendo, byose mu gihe cy’amasaha 24/7.

Miss Baza izafasha abantu badafite smartphone cyangwa interineti kubona serivisi mu buryo bworoshye ikaba ishimangira icyerekezo cyo gukora AI ku nyungu z’Afurika, ku Banyarwanda, kandi mu ndimi z’Afurika.

Umuyobozi ushinzwe ibikoresho by’ikoranabuhanga na serivisi z’ikoranabuhanga muri MTN Rwanda, Nzabakira René yasobanuye ko iyi serivisi ikoreshwa binyuze ku guhamagara.

Ati: ”Ni Serivisi okoreshwako ijwi ryawe aho uhamagara  845 ,ugacishwa mu nzira aho ujya kuri serivisi ya Miss Baza. Icyo rero iyo Serivisi igufasha ni ukubaza ibibazo bitandukanye. Ushobora kubaza ibijyanye n’ubuzima,ushobora kubaza ibijyanye n’ubuhinzi ,serivisi za MTN cyangwa se izindi serivisi zitandukanye”.

Yavuze kobatekereza ko iyi serivisi izafasha Abanyarwanda badafite smartphone. Ati:”Iyo serivisi rero turatekereza ko ari serivisi izafasha Abanyarwanda bitarinze bikenera ko ufite Smartphone cyangwa ngo bigusabe ‘application’ ahubwo ni uguhamagara gusa ugakoresha ijwi ryawe gusa ubundi AI ikaba yagufasha”.

Yavuze ko kuva itangiye gukoreshwa mbere y’uko imurikwa ku mugaragaro ku munsi wejo,ikoreshwa n’abantu barenga Miliyoni ebyiri bakoresha iyo serivisi buri kwezi binyuze kuri 845 mu gihe hamaze kubazwa ibibazo birenga ibihumbi 500.

Umukiriya wese wa MTN wifuza gukoresha iyi serivisi ahabwa iminota 30 y’ubuntu yashira agacibwa 45 ku munota.

Minisitiri w'Ikoranabuhanga na Inovasiyo  Paula Ingabire iyashimiye MTN Rwanda n’abandi bafatanyabikorwa bagize uruhare mu gutuma uyu mushinga ugere ku rwego rwo gutangizwa.

Yavuze ko mbere yo gushora imari mu ikoranabuhanga ry’ubwenge buhangano, hakwiye kubanza gusubizwa ibibazo bitatu by’ingenzi: Ni ikihe kibazo dushaka gukemura? Ni bande dushakira igisubizo? Ni ubuhe buryo bwiza bwo kugikemura?

Yagize ati: “Ntekereza ko nitubasha gusubiza ibi bibazo bitatu, ikoranabuhanga ry’ubwenge buhangano rizashobora kugira impinduka zifatika mu buzima bw’abaturage bacu. Ntituzaba turimo kubaka AI kubera gusa ko dushaka kuyikoresha, ahubwo tuzaba dushaka ikoranabuhanga rifite agaciro kagaragarira mu buzima bwa buri munsi bw’Abanyarwanda.”

Yakomeje avuga ko ikibazo gikomeye Abanyarwanda benshi bahura na cyo ari ukubona amakuru yizewe kandi y’ingirakamaro, kuko kuyabona mu nzego za Leta n’iz’abikorera bisaba igihe, amafaranga n’imbaraga nyinshi.

Ati: “Ku Banyarwanda benshi, icyo bakeneye ni amakuru yabafasha mu byo bakora buri munsi. Ariko kubona ayo makuru biracyabatwara igihe kinini."

"Iyo uganiriye n’abantu benshi, usanga kubona amakuru mu kigo icyo ari cyo cyose, cyaba icya Leta cyangwa icyigenga, bisaba igihe, amafaranga menshi n’imbaraga. Ni yo mpamvu mu gihe twubaka porogaramu nka Miss Baza , dukwiye kureba uko zakemura izo mbogamizi.”

Yagaragaje ko Miss Bazaikwiye kwita ku byiciro byose by’abaturage, cyane cyane abafite telefoni zisanzwe zidashobora gukoresha porogaramu za internet, abatagira ubushobozi bwo kugura internet ndetse n’abagorwa no gusoma ibyanditse.

MTN Rwanda yamuritse Miss Baza ifasha mu gusubiza ibibazo bitandukanye

Minisitiri w'Ikoranabuhanga na Inovasiyo Paula Ingabire yashimiye MTN Rwanda yazanye umushinga wa Miss Baza