Mu ruganda rwa Schuberth Performance ruherereye mu mujyi wa Schio mu Majyaruguru
y'u Butaliyani, hamwe mu hakorerwa zimwe muri izi ngofero zikoreshwa
n'abasiganwa bakomeye ku Isi, zirimo izambarwa na Max Verstappen, Sergio Perez
na Nico Hülkenberg.
Izi ngofero ntizikorwa mu buryo busanzwe, kuko buri imwe itunganywa
n'abahanga mu ikoranabuhanga, hagamijwe kurinda ubuzima bw'umukinnyi mu gihe cy’impanuka.
Umukozi witwa Thomaso ni umwe mu bakora izi ngofero. Aho akorera mu cyumba
cyihariye kitwa “Magic Shop”, agakoresha ibikoresho byihariye mu kubumba no
gutunganya ibikoresho bikomeye bizavamo igikonoshwa cy'ingofero.
Ibikoresho akoresha birimo ubwoko bwihariye bwa Carbon Fibre bugomba kubikwa
ku bushyuhe bwa dogere Celsius -16. Akabikoresha mu gukora ingofero mu byiciro
bitandukanye, mbere y'uko bishyirwa mu gikoresho cyabugenewe, bigatekeshwa mu
gihe cy'amasaha atatu n'igice ku bushyuhe bwa dogere Celsius 120.
Iyi nzira yose ishobora kumara amasaha agera kuri atandatu, ku buryo ingofero
ikorerwa umushoferi uyikeneye, hagendewe ku mutekano, uburyo ayambaramo, ndetse
n'imiterere yifuza.
Mu myaka ya mbere ya Formula 1, umutekano w'abasiganwa ntiwari uhagije. Dore
ko bakoreshaga ingofero zoroshye zikoreshwa n'abatwara indege, amadarubindi
ndetse n'imyambaro isanzwe y'uruhu.
Giuseppe Farina, wabaye uwa mbere wegukanye isiganwa rya Formula 1 ndetse
n'igikombe cy'Isi cya mbere, yakundaga gusiganwa yambaye ingofero y'igitambaro,
amadarubindi abiri, imyambaro ya coton, inkweto n'uturindantoki by'uruhu.
Gusa mu 1966, uruganda Bell rwakoze imwe mu ngofero za mbere zipfuka umutwe
n'isura yose, zizwi nka Full-Face Helmet. Mu 1968, Dan Gurney aba umushoferi wa
mbere wakoresheje ubu bwoko bw'ingofero mu isiganwa.
Nubwo byari intambwe ikomeye, impanuka zikomeye zakomeje nyinshi.
Izi mpanuka zatumye abashinzwe umutekano muri F1 bakomeza gushaka uburyo bwo
kunoza ibikoresho birinda abakinnyi, birimo ingofero, akuma ka HANS karinda
ijosi n'umutwe ndetse n'ikoranabuhanga rya Halo ririnda umutwe w'umushoferi.
Mu 2004, Ishyirahamwe Mpuzamahanga ry'Imodoka (FIA) ryashyizeho amabwiriza
mashya, asaba ko hakoreshejwe ibikoresho bikomeye kandi byoroheje birimo Carbon
Fibre. Ndetse ko ingofero zizakoreshwa zigomba kwihanganira ubushyuhe bwa
dogere Celsius 790.
Alberto Dall'Oglio avuga ko izi ngofero zishobora kwihanganira umuriro uri
ku bushyuhe bwa dogere Celsius 700 kugeza kuri 800 mu gihe cy'amasegonda 30,
hanyuma zikazima ubwazo mu masegonda 15.
Uruganda kandi rwa Schuberth rukora ingofero zigera kuri 250 buri mwaka,
kandi buri imwe ishobora kugira ibice birenga 200 biba byateranyijwe hamwe.
Ikindi gitangaje ni uko igikonoshwa cy'ingofero kimaze gukomera gicibwa
hakoreshejwe amazi afite umuvuduko ukabije wa Bar 4,000, kugira ngo haboneke
umwanya umushoferi areberamo.
Ubu buryo bwihariye butuma batagomba gukoresha imbaraga z'imashini zishobora
kwangiza imiterere y'ingofero.
Muri izi ngofero za Formula 1 imwe byibuze ipima hafi ikiro 1.4, bitewe n'imitako n'ibikoresho by'inyongera bishyirwamo.



