Mashami yatangaje abakinnyi 23 b’Amavubi bazatangiza urugamba rwo gushaka itike y’igikombe cy’Isi 2022

Ku gicamunsi cyo kuri uyu wa Gatanu tariki ya 27 Kanama 2021, nibwo Umutoza w’Ikipe y’Igihugu Mashami Vincent yatangaje urutonde rw’abakinnyi 23 azifashisha mu mikino ibiri yo gushaka itike y’igikombe cy’Isi 2022, u Rwanda ruzakina mu ntangiriro z’ukwezi gutaha kwa Nzeri.

Mu bakinnyi bashya bagaragaye kuri uru rutonde bazaba bakina umukino wa mbere w’irushanwa bambaye umwambaro w’Amavubi, barimo Rafael York, Ngwabije Clovis, Umunyezamu Buhake Clement na myugariro Rukundo Denis.

Abakinnyi babiri bakina muri Uganda, Nsengiyumva Isaac na Kalisa Jamil bazakinira Amavubi ubwo u Rwanda ruzaba ruhura na Kenya ku mukino wa kabiri wo gushaka itike y’igikombe cy’Isi 2022.

Abakinnyi barimo Ngwabije Bryan Clovis, Manzi Thierry, Rwatubyaye Abdul, Rafael York, Mukunzi Yannick, Bizimana Djihad baturuka ku mugabane w’i Burayi bazifashishwa harimo abazahurira n’Ikipe y’Igihugu muri Maroc kuko bafite imikino mu makipe basanzwe bakinira, bakiyongeraho Imanishimwe Emmanuel uzwi nka Mangwende ukina muri Maroc.

Mu ijoro ryo ku itariki ya 29 Kanama 2021, nibwo ikipe y’igihugu y’u Rwanda Amavubi izerekeza mu mujyi wa Agadir aho izakinira umukino wa mbere n’Ikipe y’Igihugu ya Mali mu majonjora yo gushaka itike y’Igikombe cy’isi kizabera muri Qatar 2022.

Amavubi Stars azakina na Mali ku wa gatatu tariki ya 1 Nzeri 2021 I saa mbiri za Kigali. FERWAFA izabamenyesha niba uyu mukino uzaca kuri televiziyo mu gihe kidatinze.
Nyuma y’uwo mukino Ikipe y’Igihugu izakira Kenya mu mukino w’umunsi wa kabiri mu itsinda E uzabera kuri Stade ya Kigali.

ABAKINNYI 23 BAZIFASHISHWA KU MUKINO WA MALI

Abanyezamu: Mvuyekure Emery, Buhake Twizere Clément, Ndayishimiye Eric

Ubwugarizi: Fitina Omborenga, Rukundo Denis, Rutanga Eric, Imanishimwe Emmanuel, Rwatubyaye Abdul, Manzi Thierry, Nirisarike Salomon, Ngwabije Bryan Clovis, Bayisenge Emery

Mu kibuga hagati: Bizimana Djihad, Twizerimana Martin Fabrice, Muhire Kévin, Mukunzi Yannick, Niyonzima Olivier, Niyonzima Haruna, Rafael York

Ubusatirizi: Kagere Medie, Tuyisenge Jacques, Byiringiro Lague, Twizerimana Onesme, Hakizimana Muhadjiri

Abakinnyi 23 b'Amavubi bazakoreshwa ku mukino wa Mali

Amavubi amaze iminsi mu myitozo yitegura imikino ibiri yo gushaka itike y'igikombe cy'Isi 2022 izakinwa mu ntangiriro za Nzeri 2021