Madamu Jeannette Kagame yitabiriye umukino ‘Carte d’identité’ wa Atome

Imyidagaduro - 2026-11-08 10:01
Sangiza:

Umwanditsi:

Madamu Jeannette Kagame yitabiriye umukino ‘Carte d’identité’ wa Atome

Madamu Jeannette Kagame yifatanyije n’abandi banyacyubahiro n’abiganjemo urubyiruko mu gitaramo cy’umukino w’ikinamico witwa ‘Carte d’identité’, wahimbwe na Ntarindwa Diogène uzwi nka Atome, ugaruka ku mateka y’u Rwanda n’uruhare rw’urubyiruko mu rugamba rwo kubohora Igihugu.

Iki gitaramo cyabereye muri Kigali Convention Centre (KCC), ku mugoroba wo ku wa Gatandatu, tariki ya 7 Ugushyingo 2026.

Mu bitabiriye iki gikorwa harimo Madamu Jeannette Kagame, Minisitiri w’Urubyiruko n’Ubuhanzi, Dr. Utumatwishima Jean Nepo Abdallah, Minisitiri w’Uburezi, Dr. Gaspard Twagirayezu, na Minisitiri w’Ubumwe bw’Abanyarwanda n’Inshingano Mboneragihugu, Dr. Jean-Damascène Bizimana.

Atome ni we watangije igitaramo, aha ikaze abitabiriye ndetse anabasobanurira igitekerezo n’amavu n’amavuko y’umukino ‘Carte d’identité’ wari ugiye kwerekanwa.

Mbere yo kuwubagezaho, yabanje gusogongeza abitabiriye iki gitaramo ku mushinga mushya yatangiye gutegura, ugamije kugaruka ku mateka y’urugamba rwo kubohora u Rwanda.

Uyu mushinga yawise ‘Legacy Project: Igitaramo cy’Inkotanyi’, ateganya kuwumurikira Abanyarwanda mu 2027. Yagaragaje ko ari igikorwa kigamije kwigisha cyane cyane urubyiruko amateka yo kubohora Igihugu, hifashishijwe ubuhanzi, ikinamico n’indirimbo.

Abitabiriye igitaramo kandi basogongejwe kuri ‘soundtrack’ y’uyu mushinga, igizwe n’indirimbo n’injyana zifite aho zihuriye n’amateka y’urugamba rwo kubohora Igihugu.

Atome yavuze ko ‘Carte d’identité’ yayiteguye ashingiye ku buhamya bw’amateka ye bwite, anagaragaza uruhare rw’urubyiruko mu rugendo rwo kubohora u Rwanda.

Uyu mukino w’ikinamico wagaragajwe mu rurimi rw’Igifaransa, ugaruka ku bihe bitandukanye u Rwanda rwanyuzemo, amateka yarwo n’uruhare rw’Abanyarwanda mu rugendo rwo kubohora Igihugu. Mu bawugizemo uruhare harimo na Ruti Joel.

Nyuma yo kwerekana uyu mukino, hakurikiyeho ibindi bikorwa ndetse n’ikiganiro nyunguranabitekerezo (Panel Discussion), cyahaye abitabiriye umwanya wo kungurana ibitekerezo ku butumwa n’amateka byagarutsweho muri iki gitaramo.

Ntarindwa Diogène uzwi nka Atome ni umwe mu bahanzi nyarwanda bakoresha urwenya, ikinamico n’ubundi buryo bw’ubuhanzi mu gutanga ubutumwa no kugeza ku bantu ibitekerezo bitandukanye.

‘Carte d’identité’ ni umwe mu mishinga ye yibanda ku mateka, mu gihe ‘Legacy Project: Igitaramo cy’Inkotanyi’ ateganya kumurika mu 2027 ari undi mushinga agamije gukoresha ubuhanzi mu kwigisha amateka y’u Rwanda, by’umwihariko urubyiruko.

Madamu Jeannette Kagame yitabiriye ku nshuro ya gatatu igitaramo cya Atome ‘Carte d’identité’.

‘Carte d’identité’ yagarutse ku mateka y’u Rwanda n’urugamba rwo kubohora Igihugu


Madamu Jeannette Kagame yitabiriye umukino ‘Carte d’identité’ wa Atome

Abantu benshi bitabiriye igitaramo cya Atome ‘Carte d’identité’ cyabereye muri KCC.


Atome ateganya kumurika ‘Legacy Project’ mu 2027



Ibitekerezo (0)

    Inkuru nyamukuru

    Loading...
    Loading...
    Loading...
    Loading...

    Inkuru bijyanye

    Loading...
    Loading...
    Loading...
    Loading...
    Loading...
    Loading...
    Loading...
    Loading...