Uyu mukinnyi w'imyaka 31 y'amavuko yasinyiye iyi kipe ndetse ahita anerekeza mu mwiherero wayo uri kubera muri Austria, aho yatangiye kwitegura umwaka mushya w'imikino wa 2026/2027.
Leroy-Jacques Mickels wavukiye i Siegburg mu Budage, afite ubunararibonye mu Cyiciro cya Gatatu cy'icyo gihugu, aho yakiniye amakipe arimo MSV Duisburg na Türkgücü München, akina imikino 64 ndetse atanga umusaruro w'ibitego n'imipira yavuyemo ibitego 17.
Mu 2023 yerekeje hanze y'u Budage, akinira amakipe yo muri Bulgaria na Saudi Arabia mbere yo kwerekeza muri Azerbaijan, aho yakiniraga Zira FK kuva muri 2024.
Imikinire ye ni yo yatumye ahamagarwa mu Ikipe y'Igihugu y'u Rwanda, Amavubi kuva mu mikino ya FIFA Series 2026 aho amaze gutsinda ibitego bibiri mu mikino ibiri yakinnye.
Umuyobozi ushinzwe siporo muri SV Waldhof Mannheim, Gerhard Zuber, yavuze ko bishimiye kubona Mickels kuko ari umukinnyi ufite uburambe kandi uzi neza shampiyona y'u Budage.
Yagize ati: "Leroy afite impano idasanzwe. Azadufasha kongera ubukana ku mpande z'ikibuga kuko azi guca ku bakinnyi, anafite ubushobozi bwo gutsinda akoresheje amaguru yombi. Ni umukinnyi twari dukeneye kugira ngo twongere uburyo bwo kubona ibitego."
Ku ruhande rwe, Leroy-Jacques Mickels yavuze ko yishimiye cyane gusubira gukina mu Budage no kwinjira muri SV Waldhof Mannheim.
Yagize ati: "Nishimiye cyane iki cyemezo. Mu biganiro nagiranye n'ubuyobozi bw'iyi kipe nahise numva uburyo bwabo bwo gukina. Ni yo mpamvu nahisemo kuza hano. Ntegereje cyane gukinira imbere y’abafana b'iyi kipe muri Carl-Benz-Stadium, kandi nzakora ibishoboka byose dufatanye n'ikipe kugira ngo tugire umwaka mwiza."
Undi Muyobozi ushinzwe siporo muri iyi kipe, Mathias Schober, yavuze ko mu myiteguro y'imbere ya shampiyona babonye ko bakeneye kongera imbaraga ku mpande z'ubusatirizi, bityo kubona Mickels bikaba ari inyongera ikomeye.
Yagize ati: "Leroy ni umukinnyi ugora ba myugariro, afite imbaraga, azi kunyura ku bakinnyi kandi azadufasha kongera ubukana mu busatirizi. Twishimiye ko yahise yifatanya n'ikipe mu mwiherero kugira ngo yitegurane na bagenzi be."
Leroy-Jacques Mickels w’Amavubi yasinyiye SV Waldhof Mannheim ikina mu Cyiciro cya Gatatu mu Budage