Kylian Mbappé mu nzira zo gukuraho agahigo ka Cristiano Ronaldo muri Real Madrid kamaze imyaka 12

Ku munsi w'ejo ni bwo Real Madrid yatsinze Athletic Club ibitego 3-0 mu mukino wo ku munsi wa 15 wa shampiyona ya Espagne. Muri ibi bitego harimo bibiri byatsinzwe na Kylian Mbapee. Ibi byahise bituma muri uyu mwaka wa 2025 yuzuza ibitego 55 amaze gutsindira iyi kipe.

Ari mu nzira zo gukuraho agahigo gafitwe na Cristiano Ronaldo aho ari we mukinnyi watsindiye Real Madrid ibitego byinshi mu mwaka umwe. Muri 2013, Cristiano yayitsindiye ibitego 59,bivuze ko Mbappé asabwa gutsinda ibitego bine cyangwa birenzeho mbere y’uko uyu mwaka urangira ubundi agahita akuraho aka gahigo.

Uyu rutahizamu urimo arashaka Ballon d’Or ye ya mbere ari mu bihe byiza dore ko kuva uyu mwaka w’imikino watangira [2025/2026] amaze gutsinda ibitego 30 ndetse akaba yaranatanze imipira irindwi yavuyemo ibitego.

Muri Real Madrid amaze gutsinda ibitego 25 ndetse yanatanze imipira 4 yavuyemo ibitego mu gihe mu ikipe ye y’igihugu y’u Bufaransa ho amaze gutsinda ibitego 5 ndetse akaba yaratanze n’imipira 3 yavuyemo ibitego.

Mbere y’uko uyu mwaka urangira, Real Madrid isigaje gukina na Celta Vigo (mu rugo), Manchester City (mu rugo), Alavés (hanze), Sevilla (mu rugo) ndetse n’undi mukino umwe wa Copa del Rey, gusa kugeza ubu ntabwo haramenyekana ikipe bazakina.

Kylian Mbappé mu nzira zo gukuraho agahigo ka Cristiano Ronaldo yashyizeho mu myaka 13 iheruka 

Kylian Mbappe akomeje kugira umwaka udasanzwe