Ibi
yabigarutseho ubwo yahuraga n’urubyiruko rusaga 6,000 rwo mu gace ka Lazio mu
Butaliyani, mu birori by’isengesho byabereye muri Paul VI Hall muri Vatikani,
byateguwe n’Inama y’Abepiskopi bo muri ako gace.
Iyi
gahunda yari ifite insanganyamatsiko igendanye n’iy’Umunsi Mpuzamahanga
w’Urubyiruko wa 2027 uzabera i Seoul muri Koreya y’Epfo, igira iti “Nimugire
ubutwari! Natsinze isi” (Yohana 16:33).
Nk’uko
byatangajwe na Vatican News, mu kiganiro yagiranye n’urwo
rubyiruko, Papa Leo XIV yasubizaga ibibazo by’abahagarariye diyosezi
zitandukanye zo muri Lazio, anabibutsa ko buri wese afite agaciro gakomeye
imbere y’Imana.
Yagize
ati: “Kristu azi amazina yacu; uko igihe kigenda, atwereka amazina yacu
nyakuri, abo turi bo by’ukuri, agaciro kacu katagira iherezo n’umwanya
yaduteganyirije mu isi.”
Papa Leo
XIV yasobanuye ko kwitagatifuza atari amarushanwa cyangwa igikorwa umuntu
agomba gukora kugira ngo yerekane ko ashoboye, ahubwo ari impano n’umuhamagaro
ujyanye n’icyifuzo cyimbitse buri muntu afite cyo kubona ibyishimo no kubaho
anezerewe.
Yagize ati
ubutagatifu “si igikorwa cyo kwigaragaza kidutera umunaniro, cyangwa ikindi
kintu dusabwa kugeraho kugira ngo twuzuze ibyo abandi batwitezeho.”
Yongeyeho
ko ubutagatifu bukura muri twe uko dukomeza gukurikira Yezu Kristu,
tutigereranya n’abandi cyangwa ngo duhatane na bo.
Gukurikira
Yezu bituma umuntu amenya uwo ari we
Uyu
Mushumba wa Kiliziya Gatolika yakomeje agaragaza ko kuba hafi ya Yezu bibohora
umuntu ku mutwaro wo guhora ahangayikishijwe n’ibyo yakoze no kugerageza
kwikiza, kuko Kristu ari we umukiza.
Yavuze ko
gukurikira Yezu bituma umuntu amenya umwirondoro we nyakuri, agasobanukirwa
agaciro afite ndetse n’umwanya Imana yamugeneye mu buzima.
Papa Leo
XIV yanagaragaje ko urubyiruko ruri mu bihe bikomeye by’amateka, birimo ibibazo
n’amahirwe, ubwoba n’icyizere, ariko ko Yezu wazutse akomeza kugendana na rwo.
Yavuze ko
Kiliziya ibaha amahirwe yo gukura mu kwemera, ariko ikanabategura gufata
ibyemezo bihamye, kuko urukundo rw’Imana ruhoraho.
Papa Leo
XIV yasobanuye ko ukwemera kwa Gikristu mbere na mbere ari ubucuti umuntu
agirana na Yezu ndetse n’abandi bose bahamagawe na we kugira ngo bamukurikire.
Inama ya
mbere ni ugusoma Ivanjili, bakamenya amagambo n’ibikorwa bya Yezu bigaragaza
urukundo abakunda, bakajya babitekerezaho buri munsi binyuze mu Byanditswe
Bitagatifu.
Inama ya
kabiri ni ugukomeza urugendo rw’ukwemera bari kumwe n’abandi bavandimwe muri
Kiliziya, kuko kuva mu ntangiriro Yezu yashatse kugira abigishwa kandi
akabubakamo umuryango umwe.
Yasoje
agaragaza ko urubyiruko rudakwiye kubona ubutagatifu nk’inshingano irunaniza,
ahubwo rukwiye kubufata nk’inzira yo kurushaho kumenya Yezu, kumumenya na rwo
rukamenya agaciro rwahawe n’Imana.