Klopp yavuze ko hakenewe umuntu mushya uyobora FIFA,
by’umwihariko hagamijwe ko umupira w’amaguru wongera gushyirwa imbere y’inyungu
z’amafaranga n’izindi nyungu zitari iz’umukino.
Gianni Infantino amaze imyaka 10 ayobora FIFA, ariko
muri icyo gihe yakunze kunengwa n’abantu batandukanye kubera ibyemezo byafashwe
ku buyobozi bwe.
Mu byaherukaga guteza impaka zikomeye harimo icyemezo
cyo gukuriraho Folarin Balogun, rutahizamu w’Ikipe y’Igihugu ya Leta Zunze
Ubumwe za Amerika, igihano cyo guhagarikwa yari yahawe nyuma yo kubona ikarita
itukura.
Iki cyemezo cyafashwe nyuma y’uko Perezida wa Amerika,
Donald Trump, avuganye kuri telefoni na Gianni Infantino amusaba kugira icyo
akora kuri icyo kibazo, ibintu byakuruye uburakari n’impaka mu bakunzi
b’umupira w’amaguru.
Ikindi cyatumye Infantino anengwa ni umugambi wo
kugurisha imigabane mu bikorwa by’ubucuruzi n’imitegurire y’ibikorwa bya FIFA,
birimo n’Igikombe cy’Isi.
Uyu mugambi ntiwishimiwe n’amashyirahamwe menshi
y’umupira w’amaguru ku migabane itandukanye. Ishyirahamwe ry’Umupira w’Amaguru
ku Mugabane w’u Burayi (UEFA) ryari ryageze aho ritangaza ko rishobora
kwitabira ubukangurambaga bwo kwanga amarushanwa ya FIFA, bituma uwo mushinga
wa FIFA Forward Enterprises uza guhagarikwa.
Infantino yagiye ku buyobozi bwa FIFA mu 2016,
asimbuye Sepp Blatter wari umaze kwegura nyuma y’uruhererekane rw’ibibazo
n’ibirego bya ruswa byari byarazengereje iri shyirahamwe.
Yongeye gutorerwa kuyobora FIFA mu 2019 no mu 2023,
nta wundi mukandida bahanganye. Ubu arateganya kongera kwiyamamaza muri Werurwe
umwaka utaha, ariko hari abandi bamaze kugaragaza ko bashaka kumuhigika.
Mu bashobora guhangana na we harimo Ramon Vega wahoze
akinira Tottenham Hotspur, ndetse na Kozo Tashima uyobora Ishyirahamwe
ry’Umupira w’Amaguru mu Buyapani.
Hari kandi Arsène Wenger wahoze atoza Arsenal wagiye
asabwa n’abantu batandukanye kwiyamamariza uyu mwanya, nubwo kugeza ubu
ataragaragaza ko azatanga kandidatire mbere y’uko igihe ntarengwa cyo kuyitanga
kigera ku wa 18 Ugushyingo.
Klopp ati: “Nyuma ya Blatter twatekereje
ko ibintu bitashoboraga kurushaho kuba bibi, ariko byarabaye.”
Ibi Klopp yabivugiye mu kiganiro n’abanyamakuru
cyabaye mbere y’umukino w’Ikipe y’Igihugu y’u Budage yagombaga guhuramo n’u
Buholandi muri UEFA Nations League.
Ubwo yabazwaga ku miyoborere ya FIFA, uyu mutoza
ntiyigeze avuga izina rya Infantino mu buryo bweruye, ariko ntiyashidikanyije
mu kugaragaza ko ashyigikiye ko habaho impinduka ku rwego rwo hejuru muri iri
shyirahamwe.
Yagize ati: “Muri rusange, abantu benshi bahuriza ku
kuba impinduka zishobora kuba ari ngombwa.Nyuma ya Sepp Blatter twatekereje ko
ibintu bitashoboraga kurushaho kuba bibi, ariko byarashobotse birushaho kuba
bibi.
Mu by’ukuri hari abantu bakunda umupira w’amaguru
kandi badafite inyungu z’amafaranga bashaka kuwukuramo. Umwe muri bo aramutse
ahawe kuyobora FIFA, byaba ari ikintu cyiza cyane.”
Si ubwa mbere Klopp agaragaje kutishimira ibyemezo bya
FIFA n’imikoranire yayo n’abanyapolitiki.
Muri Nyakanga uyu mwaka, ubwo yari ataratangira akazi ko gutoza u Budage, yanenze cyane icyemezo cyo gukuriraho Balogun igihano, agaragaza ko Trump na Infantino batagakwiye kugira uruhare mu byemezo bifatwa ku mukino.
Umutoza w’Ikipe y’Igihugu y’u Budage, Jürgen Klopp, yasabye ko ubuyobozi bwa FIFA buhinduka
