Ku mbuga nkoranyambaga hakwirakwijwe ifoto y’umukara n’umweru ya Jackie Chan iriho imibare “1954–2026”, bigatuma benshi bakeka ko uyu mukinnyi w’imyaka 72 yitabye Imana.
Gusa aya makuru nta kuri afite. Jackie Chan, amazina ye nyakuri akaba Fang Shilong, ni muzima kandi aracyakora ibikorwa bitandukanye bya sinema ndetse akagaragara mu bikorwa rusange.
Aya makuru y’ibinyoma yakwirakwijwe ku muvuduko ukomeye, aho imwe mu nyandiko yayakwirakwizaga bivugwa ko yarebwe n’abantu barenga miliyoni 3.8 mu gihe cy’amasaha atanu gusa.
Iyi foto iriho imyaka “1954–2026” ni yo isa n’iyabaye intandaro y’aya makuru, kuko yakoreshejwe mu buryo busa n’ubwo gutangaza urupfu rw’umuntu, nyamara nta tangazo ryizewe ryigeze ritangazwa rivuga ko Jackie Chan yapfuye.
Jackie Chan aheruka kugaragara mu ruhame
Mu bimenyetso bigaragaza ko Jackie Chan ari muzima harimo uko aheruka kugaragara mu ruhame muri Singapore ku wa 7 Nyakanga 2026.
Nk’uko ikinyamakuru The Straits Times cyabitangaje, Jackie Chan yasuye ishuri rya Pei Chun Public School mu gikorwa cyateguwe na Lim Family Foundation, aho yahuye n’abanyeshuri barenga 900.
Mu mashusho yagiye hanze, Jackie Chan agaragara aririmba indirimbo ye “Hard to Say Goodbye”, ndetse aganira n’abanyeshuri n’abakozi b’iryo shuri.
Ibi byabaye mu gihe gito gishize kandi ni kimwe mu bimenyetso bifatika bivuguruza amakuru y’ibinyoma avuga ko uyu mukinnyi yitabye Imana.
Jackie Chan ni umwe mu bakinnyi ba filime bazwi cyane ku Isi, akaba amaze imyaka irenga 60 akora umwuga wa sinema. Yamenyekanye cyane muri filime zirimo Rush Hour, Police Story na Drunken Master.
Nubwo aya makuru y’urupfu rwe yakwirakwiye ku mbuga nkoranyambaga, nta gihamya yizewe igaragaza ko Jackie Chan yapfuye.
Hakwirakwijwe amakuru y’ibinyoma avuga ko Jackie Chan yapfuye mu 2026