Umunyamakuru akaba
n’umushoramari mu itangazamakuru rwo muri Nigeria, Betty Irabor, yasabye abantu
kudacibwa intege no kubona ingo z’abandi zisenyuka, avuga ko kuba hari
abananirwa kubaka ingo zirambye bitavuze ko n’iz’abandi zitazaramba.
Yabigarutseho mu butumwa
yashyize ku rubuga rwa Instagram, aho yashishikarizaga abantu kugira icyizere
ku buzima bw’abashakanye, ashimangira ko buri rugo rugira amateka yarwo kandi
ko rutagomba guciribwa urubanza rushingiye ku bibazo cyangwa gatanya.
Betty Irabor, umaze
imyaka 43 mu rugo, yavuze ko nubwo imibare y’ingo zisenyuka zishobora gutera
impungenge, cyane cyane ku bantu bafite ibibazo mu ngo zabo cyangwa abatekereza
kurushinga, bidakwiye gutuma abantu bose batangira kubona gushyingirwa
nk’ikintu kidashobora kugenda neza.
Yagaragaje ko hari izisenyuka
hari n’izindi nyinshi zibanye neza, nubwo akenshi zitajya zivugwa cyane mu
bitangazamakuru cyangwa ngo zigarukweho ku mbuga nkoranyambaga.
Yasobanuye ko kubaka
urugo rukomeye bisaba imbaraga, kwigomwa, kwihangana, kwiyemeza, kwifata no
kugira ubushobozi bwo gukemura ibibazo mu bwumvikane.
Yongeyeho ko mu buzima
bw’abashakanye hashobora kubamo kutumvikana, gutenguhwa no guhindura imikorere
kugira ngo buri wese abane neza na mugenzi we. Icyakora, ngo habamo n’ubucuti,
ibyishimo, gufashanya, kugera ku ntego bahuriyeho no gukura bafatanyije.
Betty Irabor yasabye
abantu kwirinda gufata ibibazo by’abandi nk’ishingiro ry’uko biteze ko ingo
zabo zizaba zimeze. Yavuze ko ari byiza kwigira ku makosa abandi bakoze, ariko
ko bidakwiye kubatera ubwoba.
Ati: “Ibyo abandi
banyuzemo mu ngo zabo ni amateka yabo. Ayawe aracyandikwa. Ntukemere ko iherezo
ry’urugo rwabo rigena iryawe.”
Yasoje avuga ko
gushyingirwa atari amahitamo ya buri wese kandi ko nta kibazo kirimo, ariko ko
bidakwiye gufatwa nk’ikintu cyamaze kunanirana cyangwa kigiye gucika burundu,
kuko kikiri mu byifuzo n’imigambi y’abantu benshi.
Yashimangiye ko igikenewe
atari ukugabanya icyizere abantu bafitiye gushyingirwa, ahubwo ari ukongera
gusobanukirwa neza ibyo bisaba kugira ngo urugo rugende neza.
