Iyi filime ivuga inkuru ya Queen, umugore w’Umunyarwandakazi
urera abana wenyine mu gace gakennye ko mu mujyi wa Nairobi. Mu gihe ahanganye
n’ibibazo by’ubuzima bwe bwite, ahura na Anna, umunyamakuru ugeze muri Kenya ashaka gukora inkuru, bagatangira kubaka ubucuti buhindura
imibereho yabo bombi.
Mu kiganiro yagiranye na InyaRwanda, Umuhire Eliane
yatangaje ko iyi filime izerekanirwa i Kigali, agira ati: “Hagati aho nakubwira
ko hari ‘Screening’ iteganyijwe i Kigali kuri 24 Ukwakira 2026, kuri Mundi
Center.”
Muri ‘Call Me Queen’, Umuhire Eliane akina yitwa Queen,
umugore ufite amateka y’ubuzima atamworoheye, ariko ukomeje guharanira ko ejo
he hazaba heza kurusha uyu munsi.
Queen yigeze gukoresha izina rya Quinta, ariko aza kurireka
ahitamo kwitwa Queen, nk’ikimenyetso cyo kwitandukanya n’ibyamubabaje mu buzima
bwe bwo hambere no kwiyubakamo ishusho nshya y’umugore wiyubaha kandi wifuza
kwigenga.
Nyuma yo gutandukana n’umugabo we wari ufite ibibazo
by’inzoga n’ubuhemu, Queen asigara yita ku bana be wenyine. Mu gushaka amikoro,
yagerageje uburyo butandukanye bwo kwibeshaho, kugeza ubwo abonye akazi ko
gukora mu rugo rwa Anna.
Mu ntangiriro, Anna ntiyishimira uyu mugore mushya uje
kumufasha mu rugo. Icyakora, Queen amugaragariza ko afite ubushobozi bwo
gukemura ibibazo no gukora ibirenze ibyo yari amwitezeho. Uko iminsi ishira,
ubucuti bwabo burakura, Queen agafasha Anna kubona abantu n’amakuru yari
akeneye mu kazi ke k’itangazamakuru.
Iyi sano iba intangiriro y’inkuru irenze iy’abantu babiri
bahuriye mu kazi. Bombi bafite ibibazo byabo, ariko ibibabaho bibasunikira
kureba ubuzima mu bundi buryo no gufashanya mu bihe bikomeye.
Iyi filime ishingiye ku buzima bwo muri Kenya mu 1999, ubwo
icyorezo cya SIDA cyari kimwe mu bibazo bikomeye byugarije abaturage. Igaragaza
uburyo uburwayi butari ikibazo cy’ubuzima gusa, ahubwo bwanajyanaga n’ubukene,
ivangura, kubura amakuru ahagije n’imbogamizi zo kubona imiti.
Ubuzima bwa Queen burushaho gukomera igihe na we agerwaho
n’ingaruka z’icyorezo cya SIDA. Mu gihe imiti ishobora gufasha abarwayi kubaho
neza itagerwagaho na bose, cyane cyane abari mu bukene, Anna yiyemeza gushaka
uko yamufasha kubona ubuvuzi.
Aha ni ho ubucuti bw’aba bagore bugera ku kindi cyiciro.
Anna agerageza gukoresha amahirwe n’ubushobozi afite kugira ngo afashe Queen,
mu gihe Queen na we atagaragazwa nk’umuntu utegereje gutabarwa gusa, ahubwo
nk’umugore ufite ubushake bwo guhangana n’ibibazo no guharanira uburenganzira
bwe.
Iyi nkuru inagaruka ku rugamba rwo kurwanya imyumvire mibi
n’ipfunwe byari bifitanye isano na SIDA, ndetse no gusaba ko imiti n’ubuvuzi
bikenewe bigera ku bantu benshi, aho kuba amahirwe y’abafite amafaranga gusa.
Nubwo ‘Call Me Queen’ igaragaza uruhare rwa Anna mu gufasha
Queen, igaragaza kandi ko Queen afite uruhare rukomeye mu guhindura ibintu. Ni
we ufata iya mbere mu gushaka ibisubizo by’ibibazo bye, akoresha ubushobozi bwe
mu gufasha abandi no guhangana n’imbogamizi zimukikije.
Ibi bituma filime iba inkuru y’ubucuti, ariko ikanaba inkuru
y’ubushobozi bw’umugore bwo kwihitiramo icyerekezo cy’ubuzima bwe. Igaragaza
kandi ko ibibazo bikomeye byugarije umuryango bidashobora gukemurwa n’impuhwe
z’umuntu umwe gusa, ahubwo bisaba kumva abahuye na byo, kubaha ijwi no
guharanira impinduka zirambye.
Iyi filime kandi igaruka ku busumbane buri hagati y’abafite
ubushobozi n’abatabufite, cyane cyane mu gihe cyo kubona serivisi z’ubuzima. Mu
gihe bamwe bashobora kubona imiti n’ubuvuzi bitabagoye, abandi bahatirwa
guhangana n’ingaruka z’uburwayi batabifitiye ubushobozi.
Umuhire Eliane ni we uri mu bakinnyi b’ingenzi batumye iyi
nkuru igira imbaraga. Mu isuzuma rya filime ryasohotse mu kinyamakuru Screen
Daily, umukino we washimwe nk’uwigaragaza cyane, aho yakoresheje ubuhanga bwe
mu kugaragaza umugore ukomeye, ufite intego kandi utareka ibibazo ngo
bimuhitane.
Umwe mu mbaraga z’iyi filime ni uburyo Queen agaragazwa
nk’umuntu ufite imbaraga n’intege nke, ibyishimo n’agahinda, ndetse n’icyizere
cyo guhindura ubuzima bwe nubwo ahura n’ibigeragezo bikomeye.
Iyi filime kandi yafatiwe amashusho muri Kenya, aho
igaragaramo ubuzima bw’abaturage bo mu duce dukennye two muri Nairobi,
ikagaragaza ibibazo by’ubukene n’imibereho y’abantu mu gihe cy’icyorezo cya
SIDA.
Mu bandi bakinnyi b’ingenzi harimo Denise Gough ukina Anna,
Danny Sapani na Dominic West.
‘Call Me Queen’ yayobowe na Emily Atef, umuyobozi wa filime
wamenyekanye mu bikorwa bitandukanye byagaragaye mu maserukiramuco mpuzamahanga
ya sinema.
Iyi filime yakozwe hashingiwe ku gitabo Mercy cyanditswe na
Lara Santoro mu 2007. Icyo gitabo n’iyi filime bifite aho bihuriye n’inkuru
z’abagore bo muri Kenya bagize uruhare mu guhangana n’icyorezo cya SIDA no
guharanira ko abarwayi babona ubuvuzi bukwiye.
Mu buryo bwo kuvuga iyi nkuru, umuyobozi yifashishije
amashusho agaragaza ubuzima bw’icyo gihe, ndetse n’amafoto y’inyandiko agaruka
ku myigaragambyo yabaye mu rugamba rwo gusaba ubuvuzi n’imiti.
‘Call Me Queen’ ni imwe muri filime zigaragaza ko sinema
ishobora kuba umuyoboro wo kuvuga inkuru z’abantu, kugaragaza ibibazo byugarije
sosiyete no gutuma abantu bongera gutekereza ku burenganzira bwa buri wese bwo
kubaho afite icyubahiro.
Ku banyarwanda, kwerekanirwa i Kigali kwayo ku wa 24
Ukwakira 2026 kuri Mundi Center bizaba amahirwe yo kureba Umuhire Eliane mu
yindi nkuru mpuzamahanga, igaruka ku buzima bw’abagore, ubucuti, uburenganzira
ku buvuzi n’imbaraga zo guhangana n’ibigeragezo by’ubuzima.
Filime ‘Call Me Queen’ yakinnyemo Umuhire Eliane igiye kwerekanirwa i Kigali ku wa 24 Ukwakira 2026, kuri Mundi Center
Iyi filime ivuga inkuru ya Queen, umugore w’Umunyarwandakazi urera abana wenyine muri Kenya, uhangana n’ingaruka z’icyorezo cya SIDA mu mpera z’imyaka ya 1990
Ubucuti bw’umugore w’Umunyarwandakazi n’umunyamakuru ni bwo shingiro rya filime ‘Call Me Queen’, igaruka ku rugamba
rwo guhangana n’icyorezo cya SIDA muri Kenya mu 1999