Hasohotse ibimenyetso bishya bishinja Diddy kugira uruhare mu rupfu rwa Tupac Shakur

Saa yine z’ijoro, ubwo bari batwaye imodoka ya BMW y’umukara, baciye mu muhanda uherereye hafi y’umuhanda mugari wa Las Vegas. Tupac, wari ufite imyaka 25, yari yambaye ishati ya Versace n’umuringa wa zahabu, arikumwe na Knight mu modoka. Icyo gihe bari bavuye kureba umukino wa Mike Tyson, nyuma y’uko Tupac agiranye amakimbirane akomeye n'umwe mu bagize itsinda rya Crips mu kabyiniro ka casino.

Nk’uko raporo z’abashinjacyaha bo muri Leta ya Nevada zabitangaje mu Nyakanga 2024, imodoka ya Cadillac y’umweru yahagaze iruhande rw’iyabo, maze umwe mu bari bayirimo, Deandre “Big Dre” Smith, akoresheje imbunda ya Glock arasa amasasu 13. Amasasu ane yafashe Tupac mu gatuza, ukuboko n’ijosi. Suge Knight we yakomeretse ku mutwe ariko ararokoka. Uwo munsi, Tupac ntiyari yambaye umwambaro umurinda amasasu, wari usanzwe umuranga.

Yajyanywe igitaraganya ku bitaro bya University Medical Center of Southern Nevada, aho yabazwe inshuro ebyiri. Mu gikorwa cya nyuma cyo kubagwa ni bwo bamukuyemo ibihaha byo ku ruhande rw’iburyo mu kugerageza guhagarika amaraso. Nyuma yo gukomeza kuremba, ku wa 13 Nzeri 1996 saa 10:03 z’amanywa, Tupac yashizemo umwuka.

Suge Knight, ubu ufungiye muri gereza ya Richard J. Donovan Correctional Facility i California aho yakatiwe imyaka 28 kubera icyaha cyo kwica umuntu amugonze n’imodoka, yavuze ko urupfu rwa Tupac rwamuhinduriye ubuzima burundu. Ati: "Tupac yari umuntu nkunda kurusha abandi bose. Iyo mpanuka yahinduye ubuzima bwanjye by'iteka ryose."

Iby’uru rupfu bimaze imyaka hafi 30 bitavugwaho rumwe, ariko mu mwaka wa 2023, haje gufatwa Duane “Keefe D” Davis, wahoze ari umuyobozi mu itsinda rya South Side Crips, ashinjwa gutegura ubwo bwicanyi.

Mu nyandiko yashyizwe ahagaragara n’ubushinjacyaha bwa Clark County ku wa 18 Nyakanga 2024, hagaragayemo ikiganiro Davis yagiranye na polisi mu 2009, avuga ko Sean “Diddy” Combs ari we wategetse ko Tupac yicwa, akaba yari yaramusezeranyije miliyoni y’amadolari ngo yikize Tupac na Suge Knight. Ati: "Yambwiye ko akeneye gukuraho Tupac na Knight."

Davis yanashinje Diddy kuba yari afite ubwoba bukabije bwa Suge Knight, akavuga amagambo yuzuyemo uburakari ku karubanda, ibintu byafashwe nk’aho ari ubusabe bw'uko yicwa. Icyakora, Diddy yamaganiye kure ibyo ashinjwa, ndetse Polisi ya Las Vegas yatangaje ko atigeze afatwa nk’ukekwa ku rupfu rwa Tupac.

Suge Knight avuga ko nyuma yo kubura Tupac, yahisemo kuva burundu mu muziki kuko nta wundi muntu yashoboraga gukorana na we yizeye. Yongeyeho ati: "Ntabwo nashoboraga kujya mu nzu y’umuziki n’undi muhanzi. Narabyanze. Nabuze icyizere n’urukundo rwose nari mfitiye hip-hop."

Knight yakomeje avuga ko adashobora no kumva indirimbo za Tupac kuko zimuviramo agahinda gakomeye. Ati: "Iyo numvise indirimbo ye, si ibihe byiza bigaruka, ahubwo ni agahinda."

Uyu mugabo kandi yavuze ko nyuma y’urupfu rwa Tupac, nyina w’uyu muraperi, Afeni Shakur, yamusabye ko umuhungu we ahita ashyingurwa mu ibanga, ndetse ngo amuha itegeko rikomeye ngo amushyingure mu buryo bwihuse cyane. Knight yavuze ko nubwo yari azi uko Tupac yashakaga gushyingurwa, yagombaga kubaha ijambo rya nyina. Ati: "Yarambwiye ati, 'Oya, shyira mu bikorwa ibyo ngutegetse.' Naramwumviye."

Ubu, Davis aracyafunzwe, yiregura ku byaha byo kwica ku bushake, ategereje urubanza ruzaba ku wa 9 Gashyantare 2026, mu gihe Diddy nawe ari mu manza zitandukanye zirebana n’ubusambanyi, ihohotera n’icuruzwa ry’abantu. Icyemezo kizafatwa n’abacamanza mu rukiko rukuru rwa Southern District of New York.

Suge Knight asoza agira ati: "Nubwo nafatwa nk’uwafashije mu buzima bwe bwa nyuma, ndacyashaka ukuri. Tupac ntiyari akwiye gupfa gutyo."

Suge Knight (uri hagati) yatangaje amakuru mashya ashinja Diddy kugira uruhare rwa Tupac Shakur umaze imyaka 29 yitabye Imana