Vozinha
(Cape Verde) – Umunyezamu
Umunyezamu
w'imyaka 40 wa Cape Verde ni we watunguye benshi. Yafashije igihugu cye kugera
muri 1/4 cy'irangiza ku nshuro ya mbere mu mateka, afata imipira myinshi
ikomeye.
Mu mikino
yibukwaho harimo uwo yafashijemo Cape Verde kunganya na Espagne nta gitego
cyinjiye ndetse anagora cyane kuwo bahuye na Argentina kugeza umukino ugeze mu
minota y'inyongera.
Yagize amajwi 39.6% mu batoye abanyezamu, arusha n'uwatwaye Golden Glove, Unai Simón.
Pedro
Porro (Espagne) – Myugariro w'iburyo
Porro yagize uruhare rukomeye mu rugendo rwa Espagne yegukanye igikombe. Yitwaye neza mu bwugarizi ndetse anafasha cyane mu gusatira anyuze ku ruhande rw'iburyo, ari na byo byatumye atorwa muri iyi kipe y'irushanwa.
Lisandro
Martínez (Argentina) – Myugariro wo hagati
Martínez yabaye umwe mu nkingi z'ubwugarizi bwa Argentina yageze ku mukino wa nyuma. Yagaragaje ubukana mu gucunga ba rutahizamu, gutsinda imipira yo mu kirere no gutangira ibitero biturutse inyuma.
Dayot
Upamecano (u Bufaransa) – Myugariro wo hagati
Upamecano yafashije u Bufaransa kugera buhataniye umwanya wa gatatu nubwo bitakunze, agaragaza imbaraga mu guhagarika ibitero by'abo bahanganye ndetse aba umwe mu bakinnyi bahoraga bitabazwa n'umutoza Didier Deschamps.
Marc
Cucurella (Espagne) – Myugariro w'ibumoso
Cucurella yakinnye irushanwa ryiza cyane, ahuza neza akazi ko kurinda izamu no kuzamuka ashyigikira ubusatirizi. Yabaye umwe mu bafashije Espagne kurangiza irushanwa yinjijwe igitego kimwe gusa.
Rodri
(Espagne) – Umukinnyi wo hagati
Rodri ni we watowe nk'umukinnyi mwiza w'irushanwa (Golden Ball). Yagenzuraga umukino hagati mu kibuga, afasha ikipe ye kugumana umupira no kubaka ibitero, aba umutima wa Espagne yegukanye Igikombe cy'Isi.
Jude
Bellingham (u Bwongereza) – Umukinnyi wo hagati
Bellingham yongeye kwerekana ko ari umwe mu bakinnyi beza ku Isi. Usibye kuyobora umukino hagati mu kibuga, yanatsinze ibitego 7, asoza ari mu bakinnyi batsinze ibitego byinshi muri iri rushanwa.
Michael
Olise (u Bufaransa) – Umukinnyi wo hagati
Olise yabaye umwe mu bakinnyi batanze imipira myinshi yavuyemo ibitego, asoza irushanwa afite assist 7, ari byo byamugize umwe mu bakinnyi b'ingenzi mu rugendo rw'u Bufaransa.
Lionel
Messi (Argentina) – Rutahizamu
Nubwo afite imyaka 39, Messi yongeye kwigaragaza ku rwego rwo hejuru. Yatsinze ibitego 8 anatanga imipira 4 yavuyemo ibitego, ayobora Argentina kugera ku mukino wa nyuma. Imikinire ye yatumye yongera gutorerwa kujya muri 11 b’ikipe y’irushanwa.
Erling
Haaland (Norway) – Rutahizamu
Haaland yatsinze ibitego 7 mu mikino 5, afasha Norway kugera muri 1/4 cy'irangiza bwa mbere mu mateka yayo. Umukino yitwayemo neza cyane ni uwo batsinzemo Brazil ibitego 2-1 muri 1/8, aho yatsinzemo ibitego byombi.
Kylian
Mbappé (u Bufaransa) – Rutahizamu
Mbappé
yegukanye Golden Boot nyuma yo gutsinda ibitego 10 arusha abandi muri iri
rushanwa. Yanabaye umukinnyi umaze gutsinda ibitego byinshi mu mateka
y'Igikombe cy'Isi, ibintu byamuhesheje umwanya muri iyi kipe.
Iyi kipe
y'abakinnyi 11 yagaragayemo abakinnyi batatu ba Espagne, batatu b'u Bufaransa,
babiri ba Argentina, mu gihe Cape Verde, Norway n'u Bwongereza ari umukinnyi
umwe umwe. Nubwo hari abari biteze kubona abakinnyi nka Unai Simón cyangwa Pau
Cubarsí, amajwi y'abafana yahisemo aba 11 nk'abarushije abandi kwitwara neza
muri iri rushanwa.