Element ategerejwe mu bitaramo bizenguruka u Burayi bizageza mu 2026

Urugendo rwe ruzatangirira mu Mujyi wa Stockholm muri Suède, aho azahurira ku rubyiniro n’umuhanzi ukomeye wo muri Nigeria, Kizz Daniel, mu gitaramo kizaba ku wa Gatandatu, tariki 8 Ugushyingo 2025, cyateguwe na sosiyete East West Vibes iyobowe n’Umunyarwanda DJ Moze.

DJ Moze yabwiye InyaRwanda.com ko iki gitaramo kizaba ari intangiriro y’urugendo rurerure Element EleéeH agiye gukora mu Burayi, ruzamara amezi arenga ane.

Ati: “Iki gitaramo agiye guhuriramo na Kizz Daniel ni igitangiza urugendo rw’ibitaramo bye twamuteguriye. Azazenguruka ibihugu bitandukanye byo ku Mugabane w’u Burayi kugeza muri Gashyantare 2026. Ibitaramo byinshi muri byo byamaze kwemezwa.”

Yakomeje avuga ko ibi bikorwa biri mu murongo mugari wo guteza imbere umuziki nyarwanda mu ruhando mpuzamahanga. Ati: “Ni uburyo bwo gufasha abahanzi nyarwanda gukomeza kugera ku rwego mpuzamahanga, no kugira amahirwe yo guhura n’abakunzi babo mu bihugu bitandukanye.”

Element EleéeH azahaguruka i Kigali ku wa Gatanu tariki 7 Ugushyingo 2025, yerekeza i Stockholm aho azatangirira uru rugendo.

Uyu muhanzi aheruka gutaramira mu Mujyi wa Mbarara muri Uganda, mu gitaramo cyitabiriwe n’abantu barenga ibihumbi 30, cyari cyateguwe na Ray G, umwe mu bahanzi bakomeye muri icyo gihugu.

Mu myaka ibiri amaze mu muziki, Element yagiye agaragaza impano ikomeye mu kuririmba no gutunganya indirimbo. Yashyize hanze indirimbo eshanu ziri mu zikunzwe muri iki gihe zirimo Kashe, Milele, Tombe, Maso, ndetse na Fou de Toi yakoranye na Ross Kana na Bruce Melodie.

Nubwo mu minsi ishize yakunze kwibasirwa ku mbuga nkoranyambaga ashinjwa “gukoresha imbaraga nke ku rubyiniro”, uru rugendo rushya rufatwa nk’amahirwe mashya yo kugaragaza ubushobozi bwe nk’umuhanzi wuzuye, ufite intego yo gusohokana umuziki nyarwanda imipaka.

Uru rugendo rw’ibitaramo bya Element EleéeH mu Burayi ruzagera mu bihugu byinshi birimo Suède, u Budage, u Bubiligi, n’u Bufaransa, mbere yo kurangira muri Gashyantare 2026, rukazaba ari imwe mu nkingi zikomeye z’iterambere ry’umuziki nyarwanda ku rwego mpuzamahanga.

Element agiye gutangira urugendo rwe rw’ibitaramo mu Burayi, ahereye muri Suède, aho azaba ari kwamamaza umuziki we no kwegera abafana bamukunze kuva yatangira ubuhanzi

Element EleéeH azahurira na Kizz Daniel muri Suède, mbere yo gutangira ibitaramo bye bwite mu bihugu bitandukanye byo ku Mugabane w’u Burayi

Dj Moze wateguye ibitaramo bya Element ku Mugabane w'u Burayi, yavuze ko bizarangira muri Gashyantare 2026

Element EleéeH azataramira mu bihugu bitandukanye byo mu Burayi, mu rugendo rugamije kumenyekanisha umuziki nyarwanda kurushaho

KANDA HANO UBASHE KUREBA INDIRIMBO ‘MASO’ Y’UMUHANZI ELEMENT