Uyu mugabo w’imyaka 65 y’amavuko ni we muntu wa mbere mu Bwongereza uregwa ibyaha bifitanye isano na Jenoside yakorewe Abatutsi mu 1994 yahitanye inzirakarengane zirenga miliyoni mu minsi ijana.
Ubushinjacyaha bumushinja kuba yaragize uruhare mu kwica, gutegeka, gushishikariza cyangwa kuyobora abandi mu bikorwa by’ubwicanyi ndengakamere bwakorewe Abatutsi hagati ya tariki ya 6 na 13 Mata 1994 muri Jenoside yakorewe Abatutsi.
Ashinjwa kugira uruhare mu rupfu rw'abantu batatu bo mu rugo rumwe, umushoferi wa tagisi, umugore n’umwana we muto. Amazina yabo ni Dominique Mukurarinda, Immaculee Mukankusi, Gerasi Rurangirwa, Leandre Mbogoye, Charlotte Kamaguja na Olivier Tuyishime.
Dr. Brown, utuye mu gace ka Islington mu Majyaruguru ya Londres, yatawe muri yombi nyuma y’iperereza ryamaze imyaka irindwi rikorwa n’inzego z’u Bwongereza ku byaha bya Jenoside yakorewe Abatutsi mu 1994.
Inkuru dukesha BBC ivuga ko mu iburanisha, Umucamanza Mark Lucraft KC yemeye ko arekurwa by’agateganyo, ariko ashyiraho amabwiriza akomeye kurushaho ugereranyije n’ayari yatanzwe mbere. Muri ayo mabwiriza harimo gutanga ingwate ya £100,000, ivuye kuri £25,000 yari yarategetswe mbere n’urukiko rw’ibanze.
Urukiko rwategetse kandi ko atanga pasiporo n’ibyangombwa byose byamufasha gukora ingendo mpuzamahanga, ko atemerewe gusaba ibindi byangombwa by’urugendo, ndetse ko agomba kuguma iwe mu masaha yagenwe.
Azajya kandi akurikiranwa hifashishijwe ikoranabuhanga (electronic monitoring), ndetse asabwe kujya yitaba polisi buri munsi. Umucamanza Lucraft yavuze ko kugeza igihe ingwate ya £100,000 izaba yatanzwe, Brown azakomeza gufungwa.
Dr. Brown ni umuganga wize ubuvuzi mu Rwanda mu myaka ya za 1980. Yigeze kuba umuyobozi w’Ishami ry’Ubuzima bw’Umuryango muri Minisiteri y’Ubuzima i Kigali, akaba yarabanaga n’umugore we n’umwana wabo mu mujyi wa Kigali.
Nyuma yo kujya mu Bwongereza, yakoreye umuryango Praxis ufasha impunzi. Urubanza rwe ruzakomeza kuburanishwa ku wa 9 Ukwakira 2026 mu Rukiko rwa Old Bailey, mu gihe hakomeje iperereza ku bandi bakekwaho uruhare muri Jenoside yakorewe Abatutsi.