David Beckham yongeye kwandika amateka muri ruhago yo muri Amerika

Imikino - 2026-11-13 12:03
Share:

Umwanditsi:

David Beckham yongeye kwandika amateka muri ruhago yo muri Amerika

Umunyabigwi David Beckham agiye kuba umwe mu banyacyubahiro bashyirwa mu Nzu y’Icyubahiro ya Ruhago muri Leta Zunze Ubumwe za Amerika (National Soccer Hall of Fame), mu bakinnyi bazahabwa iki cyubahiro mu mwaka wa 2027.

Uyu wahoze ari umukinnyi wo hagati mu makipe nka Manchester United n’ikipe y’igihugu y’u Bwongereza, afite imyaka 51, yamenyekanye cyane muri ruhago yo muri Amerika muri 2007, ubwo yavaga muri Real Madrid yo muri Espagne akerekeza muri LA Galaxy yo muri Shampiyona ya MLS, ayisinyira amasezerano y’imyaka itanu.

Mu gihe yamaze muri LA Galaxy, Beckham yakinnye imikino 124 mu marushanwa yose, atsinda ibitego 20. Yafashije iyi kipe kwegukana igikombe cya MLS Cup inshuro ebyiri ndetse na Supporters’ Shield inshuro ebyiri.

Kumara ibihe bitandatu muri LA Galaxy byagize uruhare rukomeye mu kumenyekanisha Shampiyona ya MLS ku rwego mpuzamahanga, dore ko Beckham yari umwe mu bakinnyi bakomeye ku Isi.

Nyuma yo gusezera ku gukina ruhago muri 2013, Beckham yakomeje kugira uruhare muri uyu mukino, aza kuba umwe muri ba nyiri Inter Miami yo muri MLS. Iyi kipe yaje gusinyisha Lionel Messi, wegukanye igikombe cy’Isi ari kumwe na Argentine muri 2022.

Beckham azinjizwa muri iyi Nzu y’Icyubahiro mu birori biteganyijwe ku wa 16 Mata 2027, bizabera i Frisco muri Leta ya Texas.


Amakuru yo guhabwa iki cyubahiro yayamenyeshejwe ku wa Kane, mu nama y’abayobozi b’amakipe ya MLS. Yavuze ko urugendo rwe muri Leta Zunze Ubumwe za Amerika rwabaye urw’agatangaza.

Yagize ati: “Ndifuza gukomeza kugira uruhare mu guteza imbere iyi shampiyona ndetse na ruhago muri iki gihugu cyiza mu gihe kirekire.”

Mu gihe yari muri LA Galaxy, Beckham yanatijwe mu ikipe ya AC Milan yo mu Butaliyani inshuro ebyiri, muri 2009 no muri 2010.

Uretse Beckham, abahoze bakinira ikipe y’igihugu ya Leta Zunze Ubumwe za Amerika mu bagore, Megan Rapinoe na Julie Ertz, na bo batorewe kwinjizwa muri iyi Nzu y’Icyubahiro ku nshuro yabo ya mbere bemerewe guhatanira iki cyubahiro.

Rapinoe, ufite imyaka 41, yegukanye Ballon d’Or, mu gihe Ertz w’imyaka 34 yakiniraga hagati mu kibuga. Aba bombi bafashije ikipe y’igihugu ya Amerika kwegukana Igikombe cy’Isi cy’Abagore muri 2015 no muri 2019.

Rapinoe abinyujije kuri Instagram, yavuze ko yishimiye kuba agiye gushyirwa mu cyiciro kimwe n’abandi bakinnyi bakomeye bagize uruhare mu mateka ya ruhago y’iki gihugu, barimo abo bakinanye.

yavuze ko iki gihembo kimwereka ko yabaye umwe mu bagize amakipe akomeye kandi akagira uruhare mu ntsinzi yayo.

 



Ibitekerezo (0)

    Inkuru nyamukuru

    Loading...
    Loading...
    Loading...
    Loading...

    Inkuru bijyanye

    Loading...
    Loading...
    Loading...
    Loading...
    Loading...
    Loading...
    Loading...
    Loading...