Iyo urebye urugendo rw’aba bahanzi bombi, usanga imikoranire
yabo itagarukira gusa ku ndirimbo bakoze cyangwa ibitaramo bahuriyeho. Hari
ibikorwa bitandukanye byagiye bigaragaza ko bafitanye umubano wihariye, aho
buri wese yagiye agaragara mu bikorwa by’ingenzi by’undi.
Kuva Bwiza yahitamo Bruce Melodie kuri Album ye, akamugirira
icyizere mu bikorwa bitandukanye, kugeza ubwo amuhisemo mu bahanzi yifuza ko
bazifatanya na we mu birori byo gusezerana imbere y’amategeko, ni ibintu
byagiye byongera kugaragaza ubusabane bwabo.
Ibintu bitanu bigaragaza ko umubano wa Bwiza na Bruce
Melodie urenze ubufatanye busanzwe mu muziki.
1. Bwiza yahisemo Bruce Melodie kuri Album ye ‘25 Shades’
Kimwe mu bimenyetso bikomeye byagaragaje umubano w’aba
bahanzi ni uko Bwiza yahisemo gukorana na Bruce Melodie kuri Album ye ya kabiri
yise ‘25 Shades’, yasohotse ku wa 16 Gicurasi 2025.
Kuri iyi Album, Bwiza yahurije hamwe Bruce Melodie na The
Ben, abahanzi babiri bafite amazina akomeye mu muziki nyarwanda no mu karere,
ibintu byari bifite umwihariko kuko batari basanzwe bakorana indirimbo.
Bruce Melodie na Bwiza bakoranye indirimbo ‘Ogera’, iri kuri
iyi Album, ikaba imwe mu ndirimbo zagaragaje imikoranire y’aba bahanzi.
Kuba Bwiza yarahisemo Bruce Melodie kuri uyu mushinga, byari
ikimenyetso cy’icyizere yari amufitiye, cyane ko Album ari igikorwa umuhanzi
ashyiraho umutima, agahitamo abantu yifuza ko bagira uruhare mu ishusho
y’umuziki we.
Mu nkuru InyaRwanda, yakoze ku wa 15 Gicurasi 2025,
Umujyanama wa Bwiza, Uhujimfura Claude, yavuze ko guhitamo Bruce Melodie na The
Ben byari bishingiye ku kuba ari bamwe mu bahanzi bakomeye mu Rwanda.
Bwiza na we yashimiye abahanzi bafatanyije na we kuri iyo
Album, agaragaza ko ubwitange, urukundo n’umutima bashyize mu mushinga byatumye
ugerwaho.
Ibi byari intambwe ikomeye mu rugendo rwa Bwiza, kuko
yabashije guhuriza ku mushinga umwe abahanzi bafite ubunararibonye n’amazina
akomeye mu muziki nyarwanda.
2. Bruce Melodie yari mu bahanzi Bwiza yifuje ko bazifatanya
na we mu birori byo gusezerana imbere y’amategeko
Ikindi kimenyetso cyagaragaje umubano wihariye hagati ya
Bwiza na Bruce Melodie ni uko uyu muhanzi yari mu bahanzi Bwiza yifuje ko
bazifatanya na we mu birori byo gusezerana imbere y’amategeko.
Ku wa 23 Ukwakira 2026, Bwiza yasezeranye imbere y’amategeko
na Uhujimfura Jean Claude, usanzwe ari Umuyobozi wa KIKAC Music ireberera
inyungu ze.
Uyu muhango wabereye mu Murenge wa Kimihurura mu Mujyi wa
Kigali, mu Karere ka Gasabo, nyuma y’imyaka itanu aba bombi bakorana, kuko
batangiye gukorana mu 2021.
Ni umuhango wari intambwe ikomeye mu buzima bwite bwa Bwiza,
kuko yahisemo kwemeza imbere y’amategeko isezerano ryo kubana akaramata
n’umuntu bamaze imyaka bakorana mu rugendo rw’umuziki.
Mu bantu n’ibyamamare byagaragaye muri ibi birori harimo Nyambo
Jesca na Bianca Baby, mu gihe Bruce Melodie na we yari mu bahanzi Bwiza yifuje
ko bazifatanya na we muri ibi birori.
Kuba umuhanzi nka Bruce Melodie ari mu bantu Bwiza
yatekerejeho mu gihe cy’ibirori bifite umwihariko mu buzima bwe, ni ikindi
kimenyetso cy’uko umubano wabo utagarukira gusa ku rubyiniro.
3. Bruce Melodie yahaye Bwiza umwanya mu bitaramo bya
‘Summer Country Tour’ byazengurutse u Rwanda
Mu 2026, Bruce Melodie yateguye ibitaramo bya ‘Summer
Country Tour’, urugendo rw’ibitaramo byazengurutse ibice bitandukanye by’u
Rwanda, aherekejwe n’abahanzi barimo The Ben, Kitoko na Bwiza.
Ibi bitaramo byatangiriye i Musanze ku wa 13 Kamena 2026,
bikomereza i Nyagatare ku wa 20 Kamena, i Bugesera ku wa 27 Kamena, bisozwa i
Rubavu ku wa 4 Nyakanga 2026.
Kuba Bwiza yari mu bahanzi Bruce Melodie yahisemo
kumuherekeza muri uru rugendo, byamuhaye amahirwe yo kuririmbana n’abahanzi
bafite izina rikomeye, ariko na we abona urubuga rwo kurushaho kumenyekanisha
umuziki we mu bice bitandukanye by’igihugu.
Mu kiganiro Bwiza yagiranye na InyaRwanda, mbere
y’igitaramo cya Bugesera, yavuze ko kuba Bruce Melodie yaramuhaye amahirwe yo
kumuherekeza muri ibi bitaramo ari ikimenyetso cy’uko imbaraga ashyira mu
muziki ziri kugera ku bandi.
Yagaragaje ko kubona icyizere cyo gukorana n’abahanzi bamaze
igihe mu muziki byamuhaye imbaraga zo gukomeza gukora cyane.
Mu gihe Bruce Melodie yari umuhanzi mukuru muri uru rugendo,
Bwiza na we yari umwe mu bahanzi bagize uruhare mu gususurutsa abakunzi
b’umuziki mu bitaramo bine byabereye mu turere dutandukanye.
Ibi byongeye kugaragaza ko Bruce Melodie atamufata gusa
nk’umuhanzi bakoranye indirimbo, ahubwo ko amuha n’amahirwe yo kwagura ibikorwa
bye no kugera ku bandi bakunzi b’umuziki.
4. Bahuriye mu bikorwa byo kwamamaza Paul Kagame,
baririmbira hamwe indirimbo ‘Ogera’
Mu 2024, Bwiza na Bruce Melodie bongeye kugaragara hamwe mu
bikorwa byo kwamamaza Paul Kagame, wari umukandida wa FPR-Inkotanyi mu matora
y’Umukuru w’Igihugu.
Aba bahanzi bari bafite indirimbo bahuriyemo yitwa ‘Ogera’,
yasohotse ku wa 13 Kamena 2024, ikaba yaragaragazaga ubutumwa bw’ishimwe ku
bikorwa bya Paul Kagame n’icyerekezo cy’ubuyobozi bwe.
Iyi ndirimbo yagiye ikoreshwa mu bikorwa byo kwamamaza
umukandida wa FPR-Inkotanyi, aho aba bahanzi bayiririmbaga mu bikorwa
bitandukanye byabereye mu gihugu.
Ku wa 22 Kamena 2024, Bruce Melodie na Bwiza bagaragaye mu
Mujyi wa Musanze, aho baririmbiye mu gikorwa cyo gutangiza ibikorwa byo
kwamamaza umukandida wa FPR-Inkotanyi.
Ibi byari ibirenze gukorana indirimbo, kuko byasabaga ko
bombi bahurira mu bikorwa byabaye mu gihe cy’amatora, bakageza ubutumwa bw’indirimbo
yabo ku bantu bari bateraniye muri ibyo bikorwa.
Indirimbo ‘Ogera’ yanabaye imwe mu ndirimbo zakoreshejwe
cyane muri icyo gihe, iba ikimenyetso cy’ubufatanye bw’aba bahanzi mu mushinga
wari ufite umwihariko mu muziki nyarwanda.
5. Bagiyе kongera guhurira muri Zambia, Bruce Melodie afashe
Bwiza kumurika Album ‘Home’
Nyuma y’ibi bikorwa byose, Bwiza na Bruce Melodie bagiye
kongera guhura ku rubyiniro, noneho mu gitaramo mpuzamahanga kizabera i Lusaka
muri Zambia.
Iki gitaramo cyiswe ‘Bwiza Home Album Concert’ giteganyijwe
ku wa 28 Ugushyingo 2026, kizabera ahitwa KK Mall, Long Acres, mu Mujyi wa
Lusaka.
Ni igitaramo Bwiza azamurikiramo Album ye nshya yise ‘Home’,
ikaba ari iya gatatu mu zo amaze gushyira hanze, nyuma ya ‘My Dream’ yasohoye
mu 2023 na ‘25 Shades’ yasohoye mu 2025.
Bruce Melodie ni we muhanzi nyarwanda wemejwe ko azafatanya
na Bwiza muri iki gitaramo, bakaziyongeraho abahanzi bo muri Zambia barimo
Roberto na Chanda Na Kay.
Uhujimfura Claude, aherutse kuvuga ko gutumira Bruce Melodie byaturutse ku mubano mwiza n’ubufatanye
basanzwe bafitanye.
Yasobanuye ko Bwiza aherutse gufasha Bruce Melodie mu
bitaramo bya ‘Summer Country Tour’, bityo ko na we ari igihe cyo kumushyigikira
mu gitaramo azakorera muri Zambia.
Yagize ati: “Dufitanye umubano mwiza na Bruce. Bwiza
aherutse kumufasha muri Summer Country Tour, ubu na we ni igihe cyo
kumushyigikira mu gitaramo cye muri Zambia.”
Ibi birerekana ko ubufatanye bwabo butari ubwo uruhande
rumwe ruhora rufasha urundi, ahubwo ko buri wese agenda agaragaza ko yiteguye
gushyigikira undi mu bikorwa bye.
Kuri iyi nshuro, Bruce Melodie azaba ari mu bafasha Bwiza
kugeza umuziki we ku isoko rishya, mu gihe we ubwe na we azungukira ku kuba ari
mu gitaramo kizahuza abahanzi bo mu Rwanda na Zambia.
Igitaramo cya Lusaka cyari cyateganyijwe ku wa 11 Nyakanga
2026, ariko gisubikwa cyimurirwa ku wa 28 Ugushyingo kugira ngo imyiteguro
irusheho kunozwa.
Umubano wabo uratanga ishusho y’ubufatanye bwihariye mu
muziki nyarwanda
Iyo usubije amaso inyuma ukareba ibikorwa bya Bwiza na Bruce
Melodie, ubona ko umubano wabo wagiye wiyubaka mu bihe bitandukanye.
Kuva Bruce Melodie yemerera Bwiza gukorana na we kuri Album
‘25 Shades’, akamuha amahirwe yo kumuherekeza muri ‘Summer Country Tour’, ni urugendo
rwagiye rubagaragaza nk’abahanzi bashobora gukorana no gushyigikirana mu
mishinga itandukanye.
Kuba Bruce Melodie yari mu bahanzi Bwiza yifuje ko
bazifatanya na we mu birori byo gusezerana imbere y’amategeko, na byo byongeye
kugaragaza umwanya afite mu bantu yifuza ko baba hafi ye mu bihe by’ingenzi.
Ubu bagiye kongera guhurira muri Zambia, aho Bruce Melodie
azaba amufasha kumurika Album ‘Home’, mu rugendo rugamije kwagura izina rya
Bwiza ku rwego mpuzamahanga.
Nubwo buri wese afite urugendo rwe bwite mu muziki, ibikorwa
byabo byagiye bigaragaza ko hari ubusabane n’icyizere byubatse hagati yabo, ku
buryo imikoranire yabo itakigarukira gusa ku ndirimbo imwe cyangwa igitaramo
kimwe.
Ku wa 28 Ugushyingo 2026, Lusaka izaba ari indi ntambwe muri uru rugendo rw’aba bahanzi, bongere bahure ku rubyiniro nyuma y’imyaka myinshi bagenda bagaragara mu bikorwa bitandukanye by’umuziki nyarwanda.

Ubufatanye bwa Bwiza na Bruce Melodie bwarenze gukorana
indirimbo, aho bagiye bahurira mu bitaramo, mu birori byihariye no mu mishinga
itandukanye irimo kumurika Album ye nshya ‘Home’ muri Zambia
Bruce Melodie yakomeje kugaragaza ko ashyigikiye urugendo
rwa Bwiza mu muziki, kuva ku ndirimbo ‘Ogera’, ibitaramo bazengurukiyemo u
Rwanda kugeza ku gitaramo bazahuriramo muri Zambia
Bwiza agiye guhurira na Bruce Melodie, Roberto na Chanda Na
Kay mu gitaramo cyo kumurika Album ye nshya ‘Home’, kizabera i Lusaka muri
Zambia ku wa 28 Ugushyingo 2026
