“Broccoli " imboga zihambaye mu gutanga ubudahangarwa bw'umubiri

Ni imboga zikubiyemo intungamubiri nyinshi zirimo vitamin K na karisiyumu, bigira uruhare mu kubungabunga ubuzima bw’umubiri cyane cyane ubuzima bw’amagufa. Izi mboga uretse kuba ziryoshye bivugwa ko zaturutse mu gihugu cy’Ubutaliyani, ariko bwa mbere zikaba zarabonetse muri Californiya muri Leta Zunze Ubumwe za America.

Ikinyamakuru BBC Good Food kivuga ko izi mboga zikungahaye ku ntungamubiri zifite akamaro gahambaye karimo kurinda umutima, kurinda kanseri, gufasha amaso kureba neza, kongera imisemburo ikenewe n’umubiri ndetse izi mboga zifasha abantu barwaye indwara z’umutima n’igifu.

Healthifyme yo itangaza ko izi mboga zigira uruhare mu gufasha ubwonko gukora neza, ndetse bikaba akarusho igihe umuntu yaziriye mu masaha ya ninjoro agiye kuryama.

Imboga za broccoli zifite imbaraga zo kuringaniza isukari mu mubiri kuburyo zakurinda kurwara indwara ya diyabete byoroshye, kandi ni nziza kuri bamwe bamaze kurwara iyi ndwara y’isukari ikabije.

Izi mboga zirihariye ku bagore batwite na none kuko zikungahaye kuri vitamin C kandi zifasha abagore kubyara abana bafite uruhu rukeye rusa neza, mu gihe hariho ababyara abana bafite uruhu rufite uduheri cyangwa uruhu rushishutse.

Ku bantu bagiye gutegura izi mboga ni byiza kuzitekana amavuta macyeya, ndetse ukitondera amavuta ayo ariyo yose ugiye gukoresha kugira ngo zigumane intungamubiri zazo kandi zigire akamaro ku mubiri wa muntu.

Amavuta azwi ku izina rya Elayo cyangwa “Olive Oil " ni amwe mu mavuta yizewe mu guteka izi mboga, n'ubwo  ahenda ariko nayo ubwayo akora nk’umuti mu mubiri dore ko bamwe bayakoresha ari mabisi.

Bhg.com ivuga ko igihe uronga izi mboga ugomba kuzitondera kuko ziteye mu buryo bworoshye bwo kubika imyanda kuko zijya gutera nk’amashu, niyo mpamvu bamwe bahitamo kuzirongesha amazi ashyushye.

Abantu bakwiye kurya imboga muri rusange kuko zikungahaye kuri vitamin C ikunze kuboneka mu zindi mboga n’imbuto, bikagira uruhare mu mikorere  myiza y’umubiri.

Umubiri wacu ni ngombwa ko wakira ibiribwa bifite akamaro aho kurira guhaga. Ibiribwa byose bigiye gutunganwa bikwiye kwitabwaho, mu buryo bwo kumenya akamaro kabyo mu mubiri.

 Izi mboga zikungahaye kuri  vitamini C, zinc  n'izindi nyinshi