Nk’uko byatangajwe na Polisi y’u Rwanda, uru rugendoshuri rwasojwe kuri uyu wa Gatatu tariki ya 23 Nzeri 2026, rukaba rwari rugamije guha aba banyeshuri ishusho ifatika y’ibyo biga mu ishuri no kubafasha kumenya uko babyifashisha mu nshingano bazaba bashinzwe.
Aba banyeshuri bari mu mahugurwa y’amezi ane yiswe Police Tactical Command Course, agamije kubongerera ubumenyi mu byerekeye ubunyamwuga n’ubuyobozi mu bikorwa byo gucunga umutekano.
Muri bo harimo abapolisi 147 bo ku rwego rwa ba ofisiye, batanu bo mu Rwego rw’Igihugu rw’Ubugenzacyaha (RIB), batanu bo mu Rwego rw’Igihugu rushinzwe Igorora (RCS) ndetse na bane bo mu Rwego rw’Igihugu rushinzwe Iperereza n’Umutekano (NISS).
Muri uru rugendoshuri, basuye uturere twa Rwamagana, Kayonza na Gatsibo mu Ntara y’Iburasirazuba, ndetse basura n’Ishami rya Polisi rishinzwe kugenzura ikoranabuhanga ryifashishwa muri Polisi y’u Rwanda (CCC).
Banakoreye urugendoshuri ahantu h’amateka n’ahibutsa urugendo rw’u Rwanda, harimo Ingoro Ndangamateka yo Kubohora Igihugu iherereye mu Karere ka Gicumbi, Urwibutso rwa Jenoside rwa Kigali ku Gisozi, Igicumbi cy’Intwari i Remera ndetse n’Ingoro Ndangamurage y’Amateka y’Urugamba rwo Guhagarika Jenoside iherereye ku Nteko Ishinga Amategeko ku Kimihurura.
Muri ibi bikorwa, basobanuriwe uruhare rw’inzego z’ubuyobozi n’ubufatanye bwazo n’inzego z’umutekano mu kubungabunga umutekano, gukemura ibibazo abaturage bahura na byo ndetse no gukumira amakosa ashobora kugira ingaruka ku gihugu.
Basobanuriwe kandi amateka mabi yaranze u Rwanda, by’umwihariko Jenoside yakorewe Abatutsi mu 1994, urugamba rwo kuyihagarika ndetse n’urugendo rwo kubaka igihugu nyuma y’uko ingabo zari iza RPA zihagaritse Jenoside.
Umuyobozi ushinzwe amasomo mu Ishuri rya Polisi ry’Amahugurwa i Gishari, Chief Superintendent of Police (CSP) Boniface Niyitegeka, wanaherekeje abanyeshuri muri uru rugendoshuri, yavuze ko rwari rugamije kubafasha kubona ishusho nyayo y’ibyo biga no kumenya uko babyifashisha mu nshingano zabo.
Yagize ati: “Amasomo aboneka muri uru rugendoshuri ni ingenzi cyane kuko ahanini yerekana uruhare n’imbaraga zisabwa ku bakora mu nzego zitandukanye, zaba iz’umutekano cyangwa iz’ubutabera. Babonera hamwe imikorere myiza ikwiriye ndetse n’igomba gukumirirwa kure tugendeye ku mateka.”
CSP Niyitegeka yakomeje avuga ko uru rugendoshuri rwabaye umwanya wo kongera kwiga amateka y’u Rwanda, ashimangira ko ayo mateka ari umusingi wo gukomeza kubaka igihugu gishingiye ku bumwe n’umutekano.
Ati: “Amateka y’urugamba rwo kubohora igihugu ubwayo ni inyigisho nziza y’ubumwe, ubwitange, ubutwari no gukunda igihugu. Iyo ufatiye urugero ku ntambwe yatewe, uba ugomba guharanira kudatezuka na gato, ahubwo ugahora wisuzuma unashyiramo imbaraga, bityo umusanzu wa buri umwe mu nshingano arimo ukagira aho uvana igihugu n’aho ukigeza.”
Yavuze kandi ko aya masomo akwiye gutuma aba banyeshuri, nk’abayobozi bashobora kugira inshingano zikomeye mu gihe kizaza, bahora bibuka amateka ya Jenoside yakorewe Abatutsi mu 1994, bakagira uruhare mu kuyigisha abandi no mu gukumira ikintu cyose cyatuma Jenoside isubira.
Chief Inspector of Police (CIP) François Mugiraneza, umwe mu banyeshuri bitabiriye uru rugendoshuri, yavuze ko rwamufashije kubona ubumenyi bushya ku ruhare rw’ubuyobozi bwiza mu buzima bw’igihugu n’abaturage.
Yagize ati: “Binyuze mu hantu hatandukanye twasuye twiboneye uburyo ubuyobozi bugira uruhare rukomeye ku buzima bw’igihugu n’abaturage muri rusange, uko ubuyobozi bubi bwasenye ubumwe bw’Abanyarwanda kugeza kuri Jenoside yakorewe Abatutsi mu 1994 n’uburyo icyemezo gikomeye cyafashwe n’ingabo zari iza RPA cyarokoye ubuzima bw’Abanyarwanda; isomo rikomeye ku rubyiruko n’uruhare rwarwo mu kwiyubakira igihugu.”
Uru rugendoshuri ni kimwe mu bikorwa bitegurirwa abanyeshuri bitabira amahugurwa ya Polisi, cyane cyane ababa begereje gusoza amasomo. Rugamije kubafasha gusobanukirwa amateka y’u Rwanda no kwimakaza indangagaciro z’ubutwari, ubuyobozi bufite icyerekezo, ubunyangamugayo n’ubwitange, bikaba bishingira ku bumenyi bahabwa mu ishuri.
