Amakuru dukesha talkSPORT
avuga ko aba bakinnyi bamaze kumvikana na Arsenal ku masezerano mashya, mu gihe
biteganyijwe ko bazasinya mu minsi iri imbere.
Ibi bibaye nyuma y’ukwezi kumwe gusa umutoza Mikel Arteta asinyiye iyi kipe amasezerano mashya azageza mu mpeshyi ya 2030.

Declan Rice agiye kongera
amasezerano kugeza muri 2031
Umukinnyi wo hagati mu
kibuga, Declan Rice, yamaze kumvikana na Arsenal ku masezerano mashya y’imyaka
itanu, azatuma aguma muri iyi kipe kugeza nibura muri 2031.
Amasezerano yari asanzwe
afite yagombaga kurangira mu mpeshyi y’umwaka utaha, ariko akaba yari afite
amahitamo yo kongerwa undi mwaka umwe kugeza muri 2029.
Umutoza Mikel Arteta yari
aherutse kugaragaza ko ibiganiro byo kongera amasezerano ya Rice bigeze kure,
avuga ko uyu mukinnyi yishimiye gukinira Arsenal kandi afite ubushake bwo
kuhaguma igihe kirekire.
Yagize ati: “Yego, uko
mbyumva ni uko yishimiye cyane kuba hano. Buri uko tuganira, ambwira ko ashaka
gukomeza gukinira iyi kipe igihe kirekire. Ni ikibazo cy’igihe gusa kugira ngo
tubyumvikaneho burundu.”
Amakuru yari yatangajwe
mbere yavugaga ko Rice ashobora kujya ahembwa ibihumbi 350 by’amapawundi ku
cyumweru, bikaba byamushyira ku rwego rumwe na Bukayo Saka nk’abakinnyi ba
Arsenal bahembwa menshi.
Rice yageze muri Arsenal muri 2023 avuye muri West Ham United, aguzwe miliyoni 105 z’amapawundi.

Jurrien Timber na we
yemeye kongera amasezerano
Undi mukinnyi
wemeranyijwe na Arsenal kongera amasezerano ni myugariro Jurrien Timber,
w’imyaka 25, ukomoka mu Buholandi.
Uyu mukinnyi na we yageze
muri Arsenal mu mpeshyi ya 2023, avuye muri Ajax yo mu Buholandi, asinya
amasezerano y’imyaka itanu yagombaga kumugeza mu 2028.
Nyuma y’ibiganiro
yagiranye n’ubuyobozi bw’iyi kipe, Timber yemeye amasezerano mashya
azamwongerera igihe azamara muri Arsenal ndetse n’umushahara.
Rice na Timber ni bamwe
mu bakinnyi bagize uruhare rukomeye mu bihe byiza Arsenal yanyuzemo mu mwaka
ushize w’imikino, ubwo yatwaraga igikombe cya Shampiyona y’u Bwongereza, ikaba
yari imaze imyaka 22 itagitwara.
Aba bakinnyi kandi bari
mu ikipe yageze ku mukino wa nyuma wa UEFA Champions League muri Gicurasi. Rice
yabanje mu kibuga, mu gihe Timber yinjiye asimbuye, ariko ntibabasha gufasha
Arsenal kwegukana igikombe, kuko yatsinzwe na Paris Saint-Germain kuri penaliti.
Kongera amasezerano y’aba
bakinnyi bombi ni inkuru nziza kuri Arsenal na Mikel Arteta, kuko bikomeza
kubaka umusingi w’ikipe igamije gukomeza guhatanira ibikombe bikomeye mu
Bwongereza no ku rwego rw’u Burayi.
