Kuwa Kabiri tariki 01 Nyakanga ni bwo umuvugizi wa White House, Anna Kelly, yavuze ko icyo cyemezo cyafashwe mu rwego rwo gushyira imbere inyungu z'Amerika, nyuma y'isuzuma ryakozwe na minisiteri y'ingabo ku bufasha bwa gisirikare bw'Amerika ku bindi bihugu.
Amerika isanzwe iha Ukraine imfashanyo ya gisirikare ifite agaciro gahenze kuva Uburusiya bugabye igitero gisesuye kuri Ukraine muri Gashyantare mu mwaka wa 2022, bituma bamwe mu bayoborana na Trump bavuga ko bahangayikishijwe no kuba ububiko bw'intwaro bw'Amerika busigayemo nkeya cyane.
Leta ya Ukraine nta cyo yari yatangaza ku mugaragaro kuri iki cyemezo ndetse na Amerika ntabwo yavuze ubwoko bw'intwaro burimo burahagarikwa. Reuters yanditse ko intwaro z'ubwirinzi bwo mu kirere n'intwaro zidahusha, ziri mu ziri guhagarikwa.