Nk’uko byagarutsweho n’ikinyamakuru BBC, hagaragajwe amafoto 10 yabaye aya mbere mu gukurura amarangamutima, agereranwa n'ibihangano by'ubugeni byamamaye mu binyejana bitandukanye. Ibi bigaragaza ko siporo n'ubuhanzi bishobora guhura, aho ifoto imwe ishobora kuvuga inkuru ikomeye nk'ishusho yashushanijwe n'umunyabugeni ukomeye.
1. Ubwongereza Vs Mexique
Ifoto yafashwe na Julian Finney mu mukino wahuje u Bwongereza na Mexique muri 1/8, igaragaza Harry Kane na Jesús Gallardo bari mu rugamba rwo guhatanira umupira hagati y'abakinnyi benshi.
Imiterere yabo isa n'iyateguwe mbere, ibintu byatumye igereranywa n'igihangano The Charge of the Lancers cy'umutaliyani Umberto Boccioni, cyerekana umuvuduko n'imbaraga mu buryo bwihariye.
2. Ghana Vs Panama
Mu mukino wa Ghana na Panama, Ernest Nuamah yagonganye bikomeye na César Blackman. Ifoto yafashwe na Nathan Denette yagaragaje uwo mwanya nk'aho ari umukino w'iteramakofe aho kuba ruhago.
Yagereranyijwe n'igihangano cy'umunyabugeni George Bellows cyerekana umukinnyi w'iteramakofe Jack Dempsey amaze gukubitwa bikomeye na Luis Firpo.
3. Bosnia-Herzegovina Vs Amerika
Ifoto y'umwana w'Umunya-Bosnia wari mu bafana, afashe umutwe mu biganza arira kubera uburyo ikipe ye yari iri gutsindwa na Leta Zunze Ubumwe za Amerika, yakoze ku mitima ya benshi.
Amarangamutima agaragara kuri uwo mwana yibukije ibihangano nka The Scream cya Edvard Munch ndetse na Medusa ya Caravaggio, byombi bizwi mu kwerekana ubwoba n'agahinda.
4. Morocco Vs Ubuholandi
Nyuma yo gutsinda penaliti yahesheje Morocco intsinzi, Ismael Saibari yafashwe yishimira intsinzi mu buryo butangaje.
Ifoto ya Carl Recine yagereranyijwe n'igishushanyo kizwi cyane cya David cyakozwe na Gian Lorenzo Bernini, cyerekana intwari ya Bibiliya mbere gato yo kurekura ibuye ryishe Goliyati.
5. Abafana ba Norway
Mu mukino wa Norway na Senegal, abafana ba Norway bakoze indirimbo yabo yo gusunika ubwato (rowing chant), bagaragaza uburyo bari bishimye.
Ifoto ya Justin Setterfield yagereranyijwe n'igihangano Rose Garden cya Paul Klee, kizwiho gukoresha amabara atukura mu kwerekana imbaraga n'ibyishimo by'abantu.
6. "Mutagatifu Ronaldo"
Abafana ba Portugal bakoze ibendera ryihariye ryerekana Cristiano Ronaldo nk'umutagatifu, rifite impeta y'urumuri ku mutwe, inkoni n'ibindi bimenyetso bikunze kugaragara ku mashusho y'abatagatifu.
Ifoto ya Thomas Coex yagaragaje uko abafana bashobora kuzamura icyamamare cya ruhago bakakigereranya n'ibishushanyo by'amadini, cyane cyane ibya Mutagatifu Jude Thaddeus.
7. Afurika y'Epfo Vs Canada
Ifoto yafashwe na Mark Terrill yerekana Sphephelo Sithole na Jonathan David bahanganiye umupira, ariko iyo urebye neza ukawukura hagati yabo, basa n'ababyinnyi ba Tango bari mu mbyino ikomeye.
Iyo foto yibukije uburyo ubuhanzi bwagiye bugaragaza abantu babiri bahujwe n'imbaraga n'imigendere imwe.
8. Messi wazamuwe nk'uzamutse mu ijuru
Nyuma yo gufasha Argentina gusezerera Misiri muri 1/8, Lionel Messi yazamuwe mu kirere n'abakinnyi bagenzi be.
Ifoto ya Carlos Barria yagereranyijwe n'igihangano Ascension of Christ cya Giovanni Battista Tiepolo, cyerekana Yezu azamurwa mu ijuru hagati y'abamwitegereza.
9. Espagne Vs Uruguay
Mu mukino wa Espagne na Uruguay, Marc Cucurella yafashwe arebana ubukana n'umupira ari guhangana na Agustín Canobbio.
Ifoto ya Fernando Llano yagereranyijwe n'ifoto y'umunyabugeni Gustave Courbet yashushanyije mu mwaka wa 1843, izwi cyane kubera uburyo amaso agaragaza ubwitange n'ubushake.
10. Ubufaransa Vs Espagne
Nyuma y'uko u Bufaransa butsinzwe na Espagne muri 1/2, Désiré Doué yafotowe yitwikiriye isura akoresheje umwambaro we.
Ifoto ya Lars Baron yibukije ibishushanyo byo mu kinyejana cya 19 byerekana abantu bapfutswe mu mwenda umeze nk'ibuye rya marimari, aho umwenda usa n'uwabaye igice cy'umubiri.
Aya mafoto agaragaza ko umupira w'amaguru utanga ibirenze intsinzi cyangwa gutsindwa. Hari igihe ifoto imwe ifata amarangamutima, imbaraga, ibyishimo cyangwa agahinda, bikaba byavugwa n'igihangano cy'ubugeni kimaze imyaka amagana.
Ni yo mpamvu amafoto yafashwe mu Gikombe cy'Isi cya 2026 atazibukwa gusa nk'ibimenyetso by'imikino ikomeye, ahubwo azanakomeza kubaho nk'ibihangano byerekana uko siporo ishobora kuba ururimi rw'ubuhanzi, amarangamutima n'amateka.