A Pass yahishuye ko Diamond Platnumz yerekana ubukire adafite

Imyidagaduro - 2026-11-21 13:09
Sangiza:

Umwanditsi:

A Pass yahishuye ko Diamond Platnumz yerekana ubukire adafite

Umuhanzi A Pass ukomoka muri Uganda yavuze ko hari abahanzi bakomeye bo muri Afurika bakoresha amayeri atandukanye mu kwerekana ubukire n’imibereho y’akataraboneka, nyamara ibyo berekana ku mbuga nkoranyambaga bitaba bihuye n’ubuzima busanzwe babamo.

Uyu muhanzi uzwi mu ndirimbo zirimo Wuyo, yagarutse ku kamaro ko kwiyubakira izina no kwamamaza isura y’umuhanzi mu ruganda rw’imyidagaduro, atanga urugero kuri Diamond Platnumz wo muri Tanzania.

A Pass yavuze ko hari abantu bibeshya ko ibyo babona ibyamamare byerekana ku mafoto no mu mashusho ari byo bibaho mu buzima bwabyo bwa buri munsi, nyamara hari igihe biba byateguwe mu rwego rwo kubaka izina no kwigarurira abafana.

Yavuze ko hari abahanzi bashobora kujya muri banki bagafata amafaranga menshi, bakishyura amafaranga ya serivisi kugira ngo bayakoreshe mu mafoto agaragaza ubukire, barangiza bakayasubiza aho bayakuye.

Yagize ati: “Bashobora kujya muri banki, bagafata amafaranga, bakishyura komisiyo, bakabafotorana yo. Nyuma bayasubiza mu rugo, ariko abantu bagasigara batekereza ko ayo mafaranga yose ari ayabo.”

A Pass yakomeje avuga ko hari n’ibindi bintu by’akataraboneka abahanzi bashobora kwifashisha mu kubaka isura yabo, birimo amafoto y’indege z’abikorera ku giti cyabo. Yagaragaje ko amwe muri ayo mafoto ashobora kuba yafatiwe ahantu hateguwe hagamijwe gusa kwerekana ko umuhanzi afite indege ye bwite.

Ku bijyanye na Diamond Platnumz, A Pass yavuze ko uyu muhanzi ashobora kuba azi neza uburyo bwo kurinda isura y’ubukire yubatse, ku buryo yirinda gufotorwa mu bihe bishobora gutuma abantu babona ibinyuranye n’ibyo yifuza ko bamumenyeraho.

Yatanze n’urugero ku bitaramo, avuga ko Diamond ashobora kuririmba indirimbo imwe akavuga ko amajwi atameze neza, bigatuma abategura igitaramo bahindura ibikoresho by’amajwi. Yavuze ko ibyo bishobora gutuma abafana bamubona nk’umuhanzi witondera cyane ubuziranenge bw’ibyo akora.

A Pass yashimangiye ko ibyo bidashatse kuvuga ko abahanzi bo hanze ya Uganda barusha impano abo muri icyo gihugu, ahubwo ko hari abazi gukoresha neza kwamamaza izina ryabo no kubaka isura ibafasha kugera ku rwego mpuzamahanga.

Ibi bitekerezo byongeye kuzamura ikibazo mu ruganda rw’imyidagaduro muri Uganda, niba kubaka isura no kwamamaza izina bifite uruhare rukomeye mu iterambere ry’umuhanzi, ni iki kibangamiye abahanzi baho gukoresha izo nzira kugira ngo barusheho kumenyekana ku rwego mpuzamahanga?

Icyakora, ibyo A Pass yavuze kuri Diamond Platnumz n’abandi bahanzi ni ibitekerezo bye, ntibikwiye gufatwa nk'ibimenyetso byemeza ko ibyo bavugwaho ari ukuri.

A Pass yahishuye ko Diamond Platnumz yerekana ubukire adafite


Ibitekerezo (0)

    Inkuru nyamukuru

    Loading...
    Loading...
    Loading...
    Loading...

    Inkuru bijyanye

    Loading...
    Loading...
    Loading...
    Loading...
    Loading...
    Loading...
    Loading...
    Loading...