Kuri uyu wa Gatanu tariki 02 Ukwakira 2020, ni bwo Peter Webster ukina umupira w'amaguru mu batarabigize umwuga yakinnye umukino wo gusezera burundu kuri ruhago, ukaba ari uwa nyuma w'irushanwa yakinnye ku myaka 80 y'amavuko.
Peter Webster, uba ahitwa Wollongong muri Australia, avuga ko hari igihe kimwe yasanze atagitanga umusaruro mu mukino nka cyera. Yabwiye BBC ati: "Hashize imyaka micye nkomeza guhanyanyaza. Ugenda urushaho gushaka gukina ariko ugatekereza uti, 'Ndi gupfusha ubusa umwambaro hano'. Umuntu aba yiyizi".
Webster yavukiye mu Bwongereza mu 1948, iwabo bimukira muri Wales/Pays de Galles. Ku myaka 15 yatangiye gukina imikino y'amarushanwa, nubwo yigaga ahantu higanje umukino wa rugby.
Uyu wahoze ari umukozi mu ruganda rukora ibyuma, yakiniye amakipe menshi muri Wales mu myaka ye 20 na 30 mbere y'uko mu 1981 yimukira muri Australia we n'umugore we Moira n'abana babo batatu.
Webster yatunguwe no gusanga umupira w'amaguru uteye imbere muri Australia, kandi ngo yahitamo "gukinira muri degere Celsius 38 kurusha muri degere Fahrenheit 38". (izo zingana na degere Celsius 3)
Yakinnye umukino we wa nyuma mu ikipe ya Figtree Football Cub y'i Wollongong, ari nako asezera ku kazi ko gukina mu kibuga. Peter yageze ku kibuga kare ku mukino wabaye kuri uyu wa gatanu nijoro, bakina na Russell Vale, iyoboye shampiyona yabo, afasha gushyira inshundura ku mazamu.
Yabanje kuvugana n'abo mu ikipe ya mukeba kugira ngo bataza gushaka kumworohera mu mukino. Webster ni icyamamare muri ako gace kugeza n'aho hari irushanwa ryamwitiriwe - Peter Webster Cup.
Ibanga ryo kuramba mu buzima no mu kibuga ryabaye gukomeza gukina nk'uko abivuga. Mu gihe yakundaga no kwiruka no kunyonga igare, umwitozo ubu abasha ni ukugenda n'amaguru n'imbwa.
Ati: "Sinkibasha kwiruka cyane. Mperuka guhura n'abakinnyi b'indi kipe ndi kugerageza barambwira ngo ni ubwa gatatu bambonye niruka muri icyo cyumweru. Ariko narababwiye nti 'hoya, njye nkunda gukina umupira".
Webster avuga ko ashaka gukurikirana uko abuzukuru be babiri - umukobwa n'umuhungu - batera imbere mu mupira. Kenshi yasibye imikino yabo kuko nawe yabaga hari iyo yagiye gukina.
Umugore we avuga ko yizeye ko noneho ubu umugabo we azajya amubona kenshi mu turimo two mu rugo. Perezida w'ikipe ya Figtree Football Cub avuga ko umusanzu Peter Webster yahaye iyi kipe "utagereranywa".
Webster w'imyaka 80 y'amavuko yakinnye umukino wa nyuma asezera burundu kuri ruhago
Webster atangaza ko atari agitanga umusaruro ukenewe mu ikipe ye ariyo mpamvu yahisemo gusezera
Webster yakundishije ruhago abuzukuru be
Eng
RSS 
TANGA IGITECYEREZO