R Kelly uri muri gereza yatabawe ubwo yari agiye kwicishwa ikaramu

R Kelly ufungiye muri gereza ya Metropolitan Correctional Center mu mujyi wa Chicago aherutse gutabarwa ubwo umwe mu mfungwa bafunganywe muri iyi gereza ageregeje kumwica akoresheje ikaramu nk'uko byatangajwe n’umwunganizi we mu mategeko.

Ku munsi wo kuwa gatatu w’icyumweru dusoje nibwo umwe mu mfungwa bivugwa ko yari yishushanyijeho ibishushanyo (Tattoo) mu maso, handitseho amagambo atuka abashinzwe umutekano, yinjiye mu cyumba R Kelly ari aryamyemo atangira kumukubita mu mutwe anagerageza kumujomba ikaramu gusa iyi mfungwa yahise ifatwa itarakomeretsa Kelly.

R Kelly yatabawe ubwo yari agiye kwicishwa ikaramu 

Umuhanzi R Kelly afungiye muri gereza yo mu mujyi wa Chicago nyuma y’uko akurikiranweho ibyaha bitandukanye bijyanye n’ihohotera rishingiye ku gitsina ibyaha byose ahakana, akaba ategereje kujyanwa imbere y’urukiko.

Umwunganizi mu mategeko wa R Kelly Bwana Greenberg yavuze ko iyi mfungwa na R Kelly batari baziranye (nta bucuti bafitanye) akaba akurikiranweho ibyaha bitandukanye by’urugomo kandi ko ari umuntu utubaha amategeko.

Greenberg yakomeje avuga ko iyi mfungwa yari yarakajwe n'uko bahagaritse gusurwa muri gereza, nyuma y’uko habaye imyigaragambyo hanze ya gereza ikozwe n’abashyigikiye R Kelly basaba ko yarekurwa. Amakuru avuga ko R Kelly yahise ashyirwa mu cyumba cya wenyine mu rwego rwo kumucungira umutekano.

Si ubwa mbere uyu mugabo asagariwe n’imfungwa muri gereza dore ko no mu kwezi dusoje, nabwo yatabawe ubwo umwe mu mfungwa yamukubitaga amuziza ko kubera imyigaragambyo y’abakunzi be yaberaga hanze ya gereza yatumye ubuyobozi bwa gereza buhagarika ibikorwa byo gusura muri gereza.   

Src: Hot 97 & Music News