India: Mu ntangiriro za 2021 urukingo rwa Covid-19 ruzaba rwabonetse

Ubuhinde buri gukora ibishoboka byose kugira ngo urukingo rwa Covid-19 ruzabe rwamaze kwemezwa mu ntangiriro z’igihembwe cya mbere cy’umwaka wa 2021. Nk’uko byatangajwe ku munsi wo ku wa Kane tariki 27 Kanama 2020, muri raporo yavuye mu bushakashatsi bwakozwe na Bernstein (ikigo kiza ku isonga mu gukora ubushakashatsi), hatangawe ko ikigo kitwa SSI (Serum Institute of India), gikora inkingo nyinshi ku isi, kiri gukora ibishoboka byose kandi kikaba gitanga icyizere cyo kuba cyabonye urukingo rwa Covid-19 mbere y’abandi bose.

Ku isi hose hari ubwoko bune bw’inkingo buteganywa ko bwavamo urwakingira Covid-19. Bubiri muri bwo bukaba buboneka mu gihugu cy’u Buhinde. Nk’uko bitangazwa na Bernstein (ikigo gikora ubushakashatsi), hakurikijwe ubushobozi bwa SII (Serum Institute of India), iki kigo gifite ubushobozi bwo kumenyekanisha rumwe muri izi nkingo u Buhinde bufite cyangwa byaba na ngombwa izi nkingo ebyiri zikazajya ku isoko nyuma yo kwemezwa ko rufite/zifite ubushobozi bwo gukingira Covid-19.

Imibare yo mu cyiciro cya mbere cy’igerageza ry’urukingo itanga icyizere kuri izi nkingo zombi; haba mu bijyanye n’umutekano ndetse n’ubushobozi inkingo zitanga k’ubudahangarwa bw’umubiri. Uburyo ibintu bimeze ubu, raporo yerekana ko izi nkingo ebyiri u Buhinde bufite zizakenerwa gutangwa inshuro ebyiri mu minsi 21 cyangwa se 28.

Raporo ivuga ko 'Serum Institute of India' ishobora gutanga miliyoni 600 z’uru rukingo rwa Covid-19 mu mwaka wa 2021, na miliyari 1 mu mwaka wa 2022. Muri zo miliyari 400 kugeza kuri 500 z’urukingo rwa Covid-19, zigomba kuboneka mu Buhinde mu mwaka wa 2021. Ibi ni mu rwego rwo kwesa umuhigo wo gutsindira isoko ry’inkingo by’umwihariko uru rukingo rwa Coronavirus.