RFL
Kigali

RBC yasabye ibyamamare gutanga urugero rwiza rwo kwirinda Covid-19

Yanditswe na: Janvier Iyamuremye
Taliki:21/08/2020 10:58
0


Umuyobozi w'ikigo cy'igihugu cy'ubuzima, RBC, Dr.Sabin Nsanzimana, yasabye ibyamamare gutanga urugero rwiza mu rugamba rwo guhangana n’icyorezo cya Covid-19.



Mu ijoro ry’uyu wa Kane tariki 20 Kanama 2020, Minisiteri y’Ubuzima yatangaje ko abantu 73 basanganywe icyorezo cya Coronavirus, barindwi barakira basezererwa mu bitaro.

Abantu 48 babonetse muri Kigali bapimwe mu bibasiwe kurusha abandi no mu masoko yafunzwe (Irya Nyarugenge n’iryo kwa Mutangana) n’aho 14 babonetse mu karere ka Rusizi.

Minisiteri y’Ubuzima kandi yatangaje ko umuntu wa 11 yitabye Imana azize Coronavirus. Ni umugabo w’imyaka 42 y’amavuko.

Dr Sabin Nsanzimana yanditse kuri Twitter kuri uyu wa Gatanu, asaba ibyamamare mu ngeri zitandukanye gutanga urugero rwiza mu rugamba rwo guhashya Covid-19 ikomeje kwica ibihumbi by’abantu ku Isi.

Yagize ati “Abahanzi, ibyamamare, abakinnyi b’umupira, abasitari: Mutange urugero rwiza rwo kwirinda Covid-19.”

Avuga ko bakwiye gutanga urugero rwiza bambara agapfukamunwa neza, basiga intera ya metero imwe buri gihe igihe bari ahantu hari benshi.

Gukaraba intoki kenshi gashoboka no kwirinda gukoresha no kwitabira ibirori.

Sabin avuze ibi mu gihe hashize iminsi abitabiriye ibirori by’umukunzi wa Sarpong bashyizwe mu kato kubera kurenga ku mabwiriza yo kwirinda Coronavirus.

Abantu barenga miliyoni 22 ku Isi bamaze kwandura Coronavurus, miliyoni zirenga 14 zarayikize n’aho abarenga ibihumbi 792 yarabishe.

Mu Rwanda abanduye Coronavirus ni 2,717, abamaze gukira ni 1,705 n’aho abo yishe ni 11.

Dr Sabin yasabye ibyamamare kudakoresha/kwitabira ibirori muri iki gihe cya Covid-19

Dr Sabin Nsanzimana Umuyobozi wa RBC yasabye ibyamamare gutanga urugero rwiza mu rugamba rwo guhangana na Covid-19






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND