RFL
Kigali

Mu mukino we wa mbere Bon Fils Caleb yafashije ikipe ye nshya kubona inota rimwe muri shampiyona

Yanditswe na: SAFARI Garcon
Taliki:16/08/2020 10:58
0

Rutahizamu w’Umurundi, Bimenyimana Bonfils Caleb wanyuze muri Rayon Sports yo mu Rwanda, mu mukino we wa mbere yafashije ikipe ya FK Pohronie aherutse gusinyira imyaka ibiri, gukura inota rimwe kuri Spartak Trnava mu mukino amakipe yombi yaguye miswi 1-1.



Wari umukino wa mbere Caleb akiniye FK Pahronie kuva yayigeramo mu cyumweru gishize, akaba yanabyitwayemo neza kuko yatangiye ahesha inota rimwe ikipe ye ku gitego kimwe yatsinze.

Caleb wakinnye iminota 63 muri uyu mukino, yatsinze igitego cyo kwishyura ku munota wa 61 w’umukino ubwo bagenzi be bari batangiye kwiheba bazi ko bagiye gutakaza amanota atatu mbumbe, nyuma y’iminota ibiri atsinze igitego Caleb yasohotse mu kibuga asimbujwe.

Nta gihe kinini gishize Caleb asinye amasezerano y’imyaka ibiri mu ikipe ya FK Pahronie yo muri Slovakia, akaba yari yagiriwe icyizere cyo kubanza mu kibuga, nawe ntiyatenguha umutoza wamwizeye ku mukino we wa mbere atsnda igitego cyahesheje inota rimwe ikipe ye.

Nyuma yuko Caleb asohotse mu kibuga amakipe yombi yafunganye, iminota 90 y’umukino irangira bagabanye amanota nyuma yo kunganya 1-1.

Bonfils Caleb yavuye mu Rwanda ahita yerekeza muri Lativia mu ikipe ya Rigas FS, kuri ubu yari ahamaze imyaka itatu, yamaze kuhava ndetse yerekeza mu ikipe nshya yo muri Slovakia.

Mu 2017 nibwo Caleb yageze muri Rayon Sports avuye muri Vital’O FC y’i Burundi, akaba ari mu bakinnyi bafashije Rayon Sports kugera muri ¼ cya CAF Confederation Cup muri 2018 kuko mu mwaka w’imikino wa 2017/2018 yari yayitsindiye ibitego 10.


Ku mukino we wa mbere Caleb yafashije ikipe ye kubona inota rimwe





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND