Kigali

Indege za Boeing 737 Max zigiye kongera gukora ingendo nyuma y’impanuka zateje abagera 346 bakahasiga ubuzima

Yanditswe na: David Mayira
Taliki:5/08/2020 10:13
0

Nyuma y’igihe kirenga umwaka, indege zo mu bwoko bwa Boeing 737 Max zikumiriwe gutwara abagenzi kubera impanuka zakoze, ubu Abagenzuzi b'iby'indege muri Leta Zunze Ubumwe za Amerika batangaje urutonde rw'impinduka zigomba gukorwa ku ndege zo mu bwoko bw'izi ndege zakoze impanuka mu bihe bishize.



Kuri ubu hasohotse inyandiko y'ikigo cy'Amerika cy'ubugenzuzi bwo gutwara abantu mu ndege (kizwi mu mpine nka FAA) ikubiyemo ibyo gishaka ko bikorwa mbere y'uko izo ndege zongera gukora ubucuruzi bwo gutwara abantu.

The History Of The Boeing 737 - Simple Flying

Kuva mu kwezi kwa gatatu mu mwaka ushize wa 2019, indege za kompanyi ya Boeing zo mu bwoko bwa 737 Max zabujijwe gukora ingendo. Hari nyuma y'impanuka ebyiri - muri Ethiopia no muri Indonesia - zahitanye abantu 346 bose hamwe, zabaye zikurikiranye mu gihe cy'amezi atageze kuri atandatu.

Kompanyi ya Boeing yizeye ko indege zayo za 737 Max zizongera kogoga ikirere mu ntangiriro y'umwaka utaha nyuma yo gukora izo mpinduka. Muri izo mpinduka zisabwa harimo kuvugurura 'software' (logiciel) igenzura kuguruka kw'indege, kuvugurura amabwiriza y'abapilote no kuvugurura ibijyanye n'ikoranabuhanga ryo mu ndege.

Mu yindi raporo bijyanye yatangajwe ejo ku wa mbere, ikigo FAA cyavuze ko amavugurura yari yasabwe n'ubuyobozi bwa Boeing nyuma yo kwisuzuma, yacyemuye bihagije ibibazo byateje izo mpanuka ebyiri.

Ibyo bisabwa nibimara gutangazwa ku mugaragaro, Boeing yahita itangira ku bishyira mu bikorwa no gutegura indege zayo ngo zongere gukora ingendo. Ayo mavugurura mu miterere y'izo ndege agomba gukorwa ku ndege zose zamaze kugurishwa ku zindi kompanyi zo gutwara abagenzi ndetse n'izitaragurwa cyangwa zitarakorwa.

Umuvugizi wa Boeing yabwiye BBC ati: "Dukomeje gutera intambwe mu nzira yo kongera kuguruka mu mutekano, dukorana bya hafi n'ikigo FAA ndetse n'abandi bagenzuzi mpuzamahanga. N'ubwo tugifite byinshi byo gukora, iyi ni intambwe ikomeye itewe mu rugendo rwo guhabwa uruhushya".

Mu gihe kompanyi ya Boeing yizeye ko indege zayo za 737 Max zongera gukora ubucuruzi bwo gutwara abantu mu ntangiriro ya 2021, kompanyi z'indege zishobora gukomeza kugira ikibazo cy'ubucye bw'abazitega kubera icyorezo cya coronavirus n'amabwiriza y'ingendo.Hari n'izindi ngorane, zirimo gushyiraho gahunda zo guhugura abapilote, abagenzuzi b'imikorere bigenga ndetse n'ibyavuye mu magerageza y'izo mpinduka.

Biteganyijwe ko Boeing izageragereza impinduka ku gutwara Boeing 737 Max ku kibuga cy'indege cya Gatwick mu Bwongereza, ahakorera cyane indege za kompanyi y'Ubwongereza ya British Airways. Mu mwaka ushize, kompanyi IAG, nyiri kompanyi ya British Airways, yashyize umukono ku ibaruwa igaragaza ubushake bwo kugura indege 200 za Boeing 737 Max.

SRC: BBC






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND