Perezida wa Iran, Hassan Rohani yatangaje kuri uyu wa Gatandatu ko abagera kuri Miliyoni 25, mu gihugu cye banduye coronavirus. Nyamara iyi mibare ihabanye n'iyo Minisiteri y'ubuzima muri iki gihugu itangaza dore ko yo ivuga ko abanduye ari 271,606. Uku kuvuguruzanya kurasigura iki?.
Iran ni kimwe mu bihugu byo mu Burasirazuba bwo hagati byashegeshwe bikomeye n'icyorezo cya coronavirus. Amakuru dukesha ibiro ntaramakuru, Tasmin, umuvugizi wa Minisiteri y'Ubuzima muri Iran, Sima Sadat Lari, yatangaje kuri uyu wa Gatandatu ko abamaze kwandura iki cyorezo ari 271,606.
Uyu mubare ni 1% cy'abo Perezida Rohani yatangaje ubwo yari mu nama y'akanama gashinzwe guhangana n'iki cyorezo. Ibi bikaba byateje urunturuntu mu gihugu cyane cyane ku bakoresha imbuga nkoranyambaga. Hari n'abasamiye hejuru iyi nkuru bavuga ko ibi bije bishimangira amakuru avuga ko Teheran itajya itangaza imibare nyayo y'abanduye n'abahitanywe na coronavirus.
Nyamara nubwo Perezida na Minisiteri y'Ubuzima batatangaje imibare imwe y'ubwandu, aba bombi bahurije ku mibare y'abamaze guhitanwa n'iki cyorezo. Abamaze guhitanwa n'iki cyorezo muri iki gihugu ni 14,000. Nyuma yo gutangaza ko abanduye basaga Miliyoni 25, Rohani yongeyeho ko inkundura ya kabiri y'iki cyorezo ishobora gusiga abandi baturage bari hagati ya Miliyoni 30 na 35 banduye iyi ndwara.
Iyi mibare ya Rohani ibaye ari yo koko, ubwandu muri Iran bwaba bukubye inshuro 2 ubwandu bwose ku isi. Ku rundi ruhande, iyi mibare na none ibaye impamo, yaba ikubye inshuro hafi 7 ubwandu buri muri Amerika ndetse cyashegeshwe n'iki cyorezo.
Iran yemeje ko igiye kongera kwibasirwa n'icyiciro cya kabiri cy'iki cyorezo. Guhera kuri iki cyumweru, tariki 19 Nyakanga, hari ibikorwa by'ubucuruzi n'ubiteranyiriza abantu hamwe ntibizongera kubaho mu rwego rwo kurwanya ubwandure bushya.
Ubusanzwe iki gihugu hari imirimo cyaricyongeye kudohorera mu rwego rwo guhangana n'ihungabanywa ry'ubukungu. Iran ni igihugu cyafatiwe ibihano mpuzamahanga by'ubukungu kubera icura ry'imbaraga kirimbuzi. Mu kwezi gushize, inteko ishingamategeko y'iki gihugu yatangaje ko cyari gifite abashomeri miriyoni 3 kubera igungana ry'ubukungu ryatewe n'ibihano mpuzamahanga. Iyi raporo yagaragazaga ko COVID19 ishobora gusiga abashomeri bageze kuri miriyoni 6.5.
Twitege ko Perezida Rohani azavuga ko yibeshye? Cyangwa koko iki gihugu cyashegeshwe by'aka kageni n'iki cyorezo?
Eng
RSS 
TANGA IGITECYEREZO