RFL
Kigali

Nyuma y’imyaka 30 itegereje, Liverpool yatwaye shampiyona y’u Bwongereza ica n’uduhigo

Yanditswe na: SAFARI Garcon
Taliki:26/06/2020 9:15
0


Imyaka 30 yo gutegereza igikombe yarangijwe n'uko Chelsea yatsinze Manchester City ibitego 2-1 kugira ngo byemezwe neza ko Liverpool itwaye iki gikombe cya shampiyona y'u Bwongereza mu mwaka w’imikino 2019/20.



Kunanirwa gutsinda kwa Manchester City mu ijoro ryo kuri uyu wa Kane, byahise bisobanura ko gushyikira Liverpool mu manota bitagishobotse, ihita yegukana gkombe cya Premer League.

Iki ni igikombe cya 19 Liverpool yegukanye, n'icya mbere itwaye kuva mu 1990, bvuze ko yari igitegereje mu myaka 30 yose.

Birengagije amategeko yo kuguma mu rugo kubera coronavirus, abafana ibihumbi ba Liverpool bahise bajya kwishimira kuri stade y'ikipe yabo ya Anfield.

Umutoza Jurgen Klopp, yambaye umwenda wa Liverpool kandi afite amarangamutima yabwiye Sky Sports ati: "Nta amagambo mfite, birenze intekerezo.

"Birenze uko natekerezaga ko bishoboka, gutwara igikombe n'iyi kipe ni ibintu byiza cyane.

"Ntabwo narindiriye imyaka 30, hano mpamaze imyaka ine n'igice, ariko ni ikintu tugezeho, cyane cyane no kubera amezi atatu tudakina kuko ntawari uzi ko tuzongera gukina.

"Ndabizi ubu birakomeye ku bantu, ariko ntabwo twakwifata. Turaza kwishimana n'abafana bacu nibishoboka".

Nyuma y'amezi atatu Premier League ihagaritswe byemejwe ko isubukura muri uku kwezi, ariko nanone mu buryo budasanzwe, aho imikino iri kuba nta bafana.

Uko bimeze ubu, bisa n'ibidashoboka gukora igikorwa gisanzwe gihuza abantu benshi cyahuriramo abafana, kwishimira igikombe birasa n'ibitagenda uko bisanzwe.

Mu buryo nanone budasanzwe, Liverpool izasubira mu kibuga ijya gusura Manchester City yatsinzwe ikabahesha igikombe.

Nyuma yo gutsindwa na Chelsea, umutoza Pep Guardiola wa City yashimiye Liverpool ku kwegukana igikombe.

Wabaye Umwaka w'imikino w'imihigo kuri Lverpool

Liverpool yahoze ari ikipe ikomeye, yatwaye ibikombe 11 bya shampiyona hagati ya 1973 na 1990, kuva icyo gihe hakurikiyeho ibihe bibi by'umwuma.

Liverpool ubu yongeye gutwara iki gikombe ariko inafite amahirwe yo guca umuhigo wo kurenza amanota 100 muri shampiyona - ufitwe na Man City - ibintu bigishoboka mu mikino isigaye.

Liverpool ubu ifite amanota 86, n'umuhigo w'imikino 28 yatsinze, kunganya kabiri no gutsindwa rimwe mu mikino 31.

Iciye umuhigo kandi wo gutwara igikombe irusha ikipe iyikurikiye amanota 25, ibitarigeze bibaho mbere mu mateka y'iyi shampiyona.

Nta bundi byabayeho kandi muri iki kiciro cya mbere mu Bwongereza ko ikipe itwara igikombe habura imikino irindwi ngo irangire.

Liverpool ubu niyo kipe ya mbere mu Bwongereza, niyo yambere iburayi nyuma yo gutwara igikombe cya Champions League giheruka mu kwa 06/2019, ni nayo kipe ya mbere ku isi nyuma yo kwegukana igikombe cy'amakipe akomeye ku isi mu Ukuboza 2019.


Bwa mbere Liverpool yegukanye igikombe cya shampiyona y'u Bwongereza kuva cyakwitwa 'Premier League' yari itegereje mu myaka 30


Nyuma yo gutwara igikombe abafana ba Liverpool bahise bahurira Kuri Stade Anfield bishimira igikombe


Abafana barenze ku mabwiriza yo kwirinda icyorezo cya Coronavirus





TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND