RFL
Kigali

Rubavu: Akarere kijeje abaturage b’akagari ka Buhaza gukurikirana ikibazo cya Rudasingwa Eric uvugwaho kubayoboza inkoni

Yanditswe na: Kwizera jean de Dieu
Taliki:21/04/2020 18:56
0

Mu gihe u Rwanda n’Isi bikomeje guhangana n’icyorezo cya Coronavirus, abaturage batuye mu kagari ka Buhaza, Umurenge wa Rubavu mu karere ka Rubavu, barinubira cyane imiyoborere y’umuyobozi w’Akagali kabo ubayoboza Inkoni no kubahoza ku nkeke. Ubuyobozi bw’Akarere bwavuze ko bugiye gukurikirana iki kibazo mu maguru mashya.



Mu gitondo cyo kuri uyu wa Mbere tariki 20 Mata 2020, ni bwo umunyamakuru wa INYARWANDA yageze mu kagari ka Buhaza asanganizwa amakuru yuzuye agahinda y’abaturage bagaragaza ko babangamiwe n’imiyoborere ya Rudasingwa Eric uyobora aka kagari ka Buhaza.

Umwe mu baturage twaganiriye wanze ko dukoresha amazina ye yavuze ko uyu muyobozi aherutse gukubita umukecuru agakubita n'uwashakaga kumutabara. Uretse uwo, abaturage bemeza ko akenshi uyu muyobozi atajya yihanganira abaturage ngo abatege amatwi dore ko ngo ahora asa n'ubarakariye.

Uyu muturage wo muri Buhaza yagize ati ”Uyu muyobozi yakubise umudamu, ndamubwira nti ese se ko ukubise uyu mudamu urabona utamuhohoteye?. Gitifu, aramubwira ati 'ahubwo reka muhohotere'. Yahise abafata abajyana mu Kagali ibyo bavuganye ntabwo mbizi.

Turasaba Leta idufashe muri iyi minsi abayobozi benshi bari kwitwaza Corona bagahohotera abaturage. Leta nitureberere kuri uyu muyobozi yashyizeho kuko mu gihe gito amaze muri aka kagali ari kugaragaza imico itari myiza yo gukubita abaturage, nibamuhane nk’ababyeyi cyangwa bamwimure”.

Umuturage waganiriye na Inyarwanda

Mu gushaka kuvugisha uyu muyobozi w’Akagari ka Buhaza Rudasingwa Eric byagoranye cyane haba ku murongo wa telefoni ye igendanwa cyangwa amaso ku maso. 

Ku ruhande rw’Akarere ka Rubavu, Umuyobozi w’Akarere Wungirije Ushinzwe Ubukungu Nzabonimpa Deogratias yatangarije InyaRwanda.com ko ikibazo cy’uyu muyobozi bagiye kugikurikirana bakamenya neza imibereho ye n’abaturage ayoboye.

Yavuze ko nibasanga afite imyitwarire idahwitse koko amategeko ari yo azamuhana. Yibukije abaturage kubaha abayobozi ndetse n’amabwiriza yashyizweho mu nzego zose mu kwirinda ikwirakwira rya Covid-19. Yagize ati:

Tugiye gukurikirana ikibazo cy’uwo muyobozi, nibigaragara ko ahohotera abaturage koko amategeko ni yo azamuhana. Tugiye kubikurikirana hazakurikizwa amategeko. N'ubwo bimeze gutyo ariko turasaba abaturage kubaha abayobozi babo, ndetse bakubaha n’amabwiriza yashyizwe cyane cyane muri ibi bihe u Rwanda n’Isi byugarijwe na Coronavirus. Bagire isuku, birinde kandi barinde n’abandi.

Twasoza iyi nkuru tubamenyesha ko Akarere ka Rubavu, gafite numero ya telefone itishyurwa ari yo 1020 aho umuturage wese ufite ikibazo icyo ari cyo cyose, amasaha 24/24 ayihamagara ku buntu agafashwa nk’uko byatangajwe na Nzabonimpa Deogratias, Umuyobozi w’akarere Wungirije Ushinzwe Ubukungu mu karere ka Rubavu.

UMVA HANO UBUHAMYA BW'UMUTURAGE TWAGANIRIYE








TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND