RFL
Kigali

Blaise Matuidi na Daniele Rugani bakinira Juventus bakize Coronavirus

Yanditswe na: SAFARI Garcon
Taliki:16/04/2020 11:50
0

Ubuyobozi bw’ikipe ya Juventus de Turin ibarizwa mu cyiciro cya mbere muri shampiyona y’u Butaliyani, bwamaze gutangaza ko abasore bayo babiri barimo Blaise Matuidi na Daniele Rugani, bakize Coronavirus bari bamaranye ukwezi.



Nyuma y’iminsi isaga mirongo itatu aba bakinnyi bari bamaze mu kato bavurwa, bitabwaho n’abaganga, byarangiye neza kuko barokotse iki cyorezo kimaze guhitana ubuzima bwa benshi ku Isi.

Myugariro Daniele Rugani na Blaise Matuidi ukina hagati mu ikipe ya Juventus bakorewe ibizamini bibiri byo gusuzuma y’uko bakirwaye iki cyorezo cya Covid-19, byose bigaragaza ko yashize mu mubiri wabo.

Juventus yatangaje ko aba bakinnyi bombi bakize ndetse ubu bamaze gukurwa mu nzu z’akato bari bamazemo igihe kirekire, bakaba basubiye mu ngo zabo.

Myugariro Rugani wakiniye Juventus imikino irindwi gusa muri uyu mwaka w’imikino, yapimwe  Kuwa 12 Werurwe 2020, basanga yanduye Coronavirus, mbere gato yo kugaragara mu bakinnyi bishimiraga intsinzi mu mukino Juventus yatsinzemo Inter Milan ibitego 2-0, aha hakaba harahise hakekwa ko hari n’abandi bakinnyi b’iyi kipe bashobora kuba baranduye iki cyorezo.

Matuidi w’imyaka 32 yahise atangira gukurikiranwa n’abaganga cyane ko guhera kuwa 11 Werurwe yari yarishyize mu kato, Kuwa 17 Werurwe 2020 arasuzumwa asanganwa Coronavirus.

Paulo Dybala ni we mukinnyi wa Juventus usigaye utarakira Coronavirus, we n’umukunzi we Oriana.

Aba bakinnyi biyongereye kuri Callum Hudson-Odoi ukina anyuze ku ruhande muri Chelsea ndetse n’umutoza mukuru wa Arsenal Mikel Arteta bombi bamaze gukira icyorezo cya Coronavirus ndetse n’abakinnyi batatu ba Fiorentina barimo Patrick Cutrone, German Pezzella ndetse na  Dusan Vlahovic baherutse gukira iki cyorezo.

U Butaliyani ni kimwe mu bihugu byazahajwe cyane n’icyorezo cya Coronavirus, kuko kugeza magingo aya imibare igaragazwa na kaminuza ya Johns Hopkins University ni uko abantu barenga 162,488bamaze kwandura, 21,067 muri bob amaze kwitaba Imana, mu gihe abakize ari 37,130.


Matuidi na Rugani bakize Coronavirus


Dybala n'umukunzi we Oriana ntibarakira Coronavirus





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND