Umuyobozi wa w'Ishami ry'Umuryango w'Abibumbye ryita ku Buzima, OMS/WHO Dr.Tedros araburira ibihugu bishaka kudohora ingamba byari byafashe mu guhashya icyorezo cya Coronavirus gihangayikishije isi muri iki gihe.
Muri iki gihe isi yugarijwe n’icyorezo cya Coronavirus
ibihugu byinshi byagiye bifata ingamba zitandukanye mu buryo bwo kwirinda ko
iki cyorezo cya komeza gukwirakwira. Kubera ibibazo bitandukanye birimo
ibirebana n’ubukungu ibihugu bimwe na bimwe birashaka kuba bigabanyije ingamba
byari byafashe. Umuyobozi wa WHO yagiriye inama ibi bihugu ko byakwitondera
gukuraho izi ngamba zirimo kuguma mu kato n'ubwo byagorwa n’ibibazo by’ubukungu.
“Ibihugu bikwiye kwigengesera mu gukuraho cyangwa kudohora
ingamba z'ibihe bidasanzwe, nubwo bimwe muri byo biri kugirwaho ingaruka mu
bukungu” Amagambo yatangajwe na Dr Tedros Adhanom Ghebreyesus umuyobozi wa WHO. Ibi
yabitangaje nyuma y'aho ibihugu birimo Espagne n'u Butaliyani - byashegeshwe
cyane na Coronavirus i Burayi - byombi biri koroshya ingamba zimwe na zimwe, mu
gihe ibihe by'akato byo bikomeje.
Nk'uko BBC dukesha iyi nkuru ibitangaza, ubwo Dr Tedros yari mu kiganiro n'abanyamakuru ku munsi w'ejo ku wa Gatanu mu buryo bwa videwo yavuze ko habayeho "igenda gahoro ryo kwishimirwa" ry'iki cyorezo mu bihugu bimwe by'i Burayi.
Kugeza uyu munsi abarenga 1,600,000 bamaze kwemezwa ko banduye Coronavirus ku isi, abarenga 100,000 imaze kubica naho abarenga 370,000 bamaze kuyikira.
Dr.Tedros yavuze ko WHO iri gukorana na za leta mu
gushyiraho ingamba zijyanye no kudohora amategeko y'ibihe bidasanzwe kubera Coronavirus. Avuga ko ibyo bidakwiye gukorwa vuba cyane. Yagize ati "Gukuraho
ingamba z'akato byihuse cyane bishobora gutuma habaho kongera kwiyongera gushya
kwa coronavirus, kuva mu kato bishobora kuba bibi cyo kimwe no kukajyamo niba
bidakozwe neza"
Kugeza uyu munsi imibare igaragaza ko muri Espagne abantu barenga 16,000 bamaze kwicwa na coronavirus, abarenga 55,000 bamaze kuyikira naho abarenga 158,000 ni bo bamaze kwemezwa ko bayanduye. Ku munsi w'ejo igihugu cya Espagne kikaba ari bwo cyageze ku mubare wo hasi cyane w'abishwe na coronavirus wa mbere mu minsi 17 ishize, abantu 605 ni bo yishe ejo.
Leta ya Espagne ikaba ikomeza gushishikariza abaturage
gukomeza gukurikiza amategeko yo kutegerana no muri iyi mpera y'icyumweru
izizihizwamo umunsi mukuru wa Pasika. Abaturage bakaba babashishikarije
gusengera mu ngo zaho.
Uko igihugu cy’u Butaliyani gihagaze kugeza uyu munsi?
Kugeza kuri uyu munsi, mu Butaliyani abarenga 147,000
bemejwe ko banduye Coronavirus, 18,849 imaze kubica naho abarenga 30,000 barayikize,
nkuko imibare ya Kaminuza ya Johns Hopkins yo muri Amerika ibigaragaza.
Umubare w'abishwe na coronavirus ejo ku wa gatanu wageze ku bantu 570, uvuye ku bantu 610 ku munsi wabanje. Umubare w'abanduye bashya na wo wagabanutseho gato ugera ku barwayi bashya 3,951, bavuye ku barwayi bashya 4,204 ku munsi wabanje.
Ese ni izihe ngamba Espagne n’Ubutaliyani bashaka kudohora?
Espagne iri kwitegura kwemerera abakozi bamwe na bamwe
bakora mu nzego zitari ingenzi cyane mu buzima busanzwe, barimo n'abakora mu
bwubatsi no mu nganda, gusubira ku kazi ku wa mbere.
Nkuko BBC dukesha iyi nkuru ibitangaza ivuga ko mu
Butaliyani, Minisitiri w'intebe Giuseppe Conte yongereye igihe cy'ibihe bidasanzwe
by'akato kugeza ku itariki ya 3 y'ukwezi gutaha kwa gatanu.
Ariko igice gito cy'ubucuruzi bwafunzwe guhera ku itariki ya
12 y'ukwezi gushize kwa gatatu, buzemererwa kongera gufungura imiryango ku wa
kabiri.
Bwana Conte yavuze by'umwihariko ko inzu zigurishirizwamo
ibitabo ndetse n'amaduka acuruza imyenda y'abana biri muri ubwo bucuruzi
buzongera gufungura.
Ariko amakuru avuga ko inzu zimeserwamo imyenda hakoreshejwe
imashini ndetse n'izindi serivisi, nabyo bishobora gushyirwa ku rutonde rw'ubwo
bucuruzi bugiye kongera gukora.
Src: bbc.com
TANGA IGITECYEREZO