Ahabanza Imyidagaduro

Producer wa Diamond yanduye Coronavirus

Yanditswe na: Janvier Iyamuremye
Taliki:31/03/2020 8:50 0

Umuhanzi w’umunya-Tanzania Diamond Platnumz yatangaje ko Producer we wihariye Lizer Classic Producer yanduye icyorezo cya COVID-19 giterwa na Coronavirus imaze kwica ibihumbi by’abantu ku Isi.

Diamond usanzwe ari umuyobozi wa Label ifasha abahanzi mu bya muzika yitwa WCB, yasohoye amashusho asaba buri wese kuguma mu rugo avuga ko ari mu kato kuva umujyanama we Sallam SK yakwandura Coronavirus, ku wa 19 Werurwe 2020.

Uyu muhanzi uherutse gusohora amashusho y'indirimbo “Jeje” amaze kurebwa n’abarenga Miliyoni 10 ku rubuga rwa Youtube, avuga ko Lizer Classic yasanzwemo Coronavirus biturutse ku kuba yari hafi ya Sallam SK.

Ati “Nk’urugero umuntu nka Lizer Classic byagaragaye ko yanduye Coronavirus ariko aragaragaza ibimenyetso byoroheje…Ni gute umuntu yahangana n’iki cyorezo ntiyongere kwandura ukundi.”

Diamond avuga ko umuntu ashobora kubana na Coronavirus iminsi irenga icumi kugeza ubwo agaragaje ibimenyetso akitabwabo n’abaganga.

Yavuze ko kuba umuntu ashobora kubana n’iyi virus bishobora no gutuma yanduza abandi mu buryo nawe atazi.

Ikinyamakuru Pulse kivuga ko Diamond yasabye buri wese kumenya uko ubuzima bwe buhagaze muri iki gihe bari mu kato.

Producer we Lizer Classic ntacyo aratangaza ku bijyanye n’ubuzima bwe.

Umuhanzi MwanaFA wo muri iki gihugu nawe aherutse gutangaza ko yanduye iki cyorezo, avuga ko ameze neza. Ibi byatumye umunyamideli Judith Heard bari baherutse guhura yishyira mu kato.

Minisitiri w’Ubuzima muri Tanzania Ummy Mwalimu, ejo kuwa Mbere yatangaje ko muri iki gihugu hari abarwayi 19 kandi ko umwe yakize.