Luka Jović agomba kwemera igihano cyose azahabwa kabone n'iyo bwaba ari uburoko – Milan Jović - AMAFOTO

Mu minsi ibiri ishize Perezida w’igihugu cya Serbia Aleksander Vucic yasabye ko rutahizamu wa Real Madrid Luka Jovic atabwa muri yombi naramuka yongeye gusohoka mu nzu ye, nyuma yo kuva mu kato yari arimo i Madrid akajya i Belgrade gusura umukunzi we Sofia Milosevic.

Ibi byakuruye imyigaragambyo ikomeye muri Serbia ndetse Perezida w’icyo gihugu, Aleksandar Vučić, ategeka ko uyu mukinnyi hamwe na Nikola Ninković ukina mu cyiciro cya kabiri mu Butaliyani, bombi batabwa muri yombi.

Papa we umubyara Milan Jović wabaye umukinnyi ukomeye mu makipe atandukanye arimo FK Partizan y’iwabo muri Serbia ndetse FC Spartak Moscow yo mu Burusiya asanga umuhungu we yararenze ku mategeko n’amabwiriza bahawe n’igihugu bityo ko agomba kwemera igihano cyose azahabwa, niyo cyaba ari igifungo agomba kucyemera.

Yagize ati”Luka yapimwe Coronavirus inshuro ebyiri basanga ari muzima, niyo mpamvu yatekereje kuza muri Serbia kandi ubu birasa naho ari icyaha gikomeye. Niba agomba kujya muri gereza, ubwo azajyamo.”

“Ndemeranya neza na Perezida ndetse na Minisitiri w’Intebe, ariko gusa mu gihe byaba bimuhamye. Nashyigikira icyo cyemezo ari uko yakoze ikintu kibi, ariko yaje muri Belgrade, aguma mu rugo.”

“Sofia yari atwite, kandi ntabwo yashoboraga kujya hanze ngo yishimire isaburu ye y’amavuko. Amafoto yagiye hanze bari kumwe basohotse, ni ayo muri Espagne.”

Luka Jović yanenzwe n’abatari bake nyuma y’aho afashe icyemezo cyo kujya kwishimira isabukuru y’amavuko y’umukunzi we muri Serbia, nyamara yakabaye ari mu rugo, mu kato k’iminsi 14 mu rwego rwo kwirinda ikwirakwira rya Coronavirus.

Luka Jovic yageze muri Real Madrid mu 2019 avuye mu Budage mu ikipe ya Entrant Frankfurt atanzweho miliyoni 65$.

Luka Jovic yarenze ajya kwisurira umukunzi we Sofia muri Serbia

Sofia Milosevic amaze igihe kinini akundana na Luka Jovic

Sofia atwite umwana wa Luka Jovic

Luka Jovic amaze igihe gito akinira Real Madrid