RFL
Kigali

Umupira w'amaguru muri Ghana wahagaritswe kubera Coronavirus

Yanditswe na: SAFARI Garcon
Taliki:17/03/2020 13:20
0


Nyuma yuko hasohotse itegeko rya Leta ya Ghana rihagarika ibikorwa byose bihuriramo abantu benshi mu rwego rwo kwirinda ikwirakwizwa rya Coronavirus, ishyirahamwe ry'umupira w'amaguru muri iki gihugu ryahise rifata umwanzuro wo guhagarika mu gihe kitazwi ibikorwa byose bijyanye n'umupira w'amaguru muri Ghana.



Ku Cyumweru nibwo Ishyirahamwe ry'umupira w'amaguru muri Ghana ryafashe iki cyemezo, nyuma yuko perezida w'iki gihugu Nan Akufo-Addo, ategetse ko ibikorwa byose bihuza abantu benshi muri iki gihugu harimo n'imikino itandukanye bihagarara mu gihe kitazwi, kugira ngo hirindwe ikwirakwizwa rya Coronavirus.

Mu ibaruwa iri shyirahamwe ryashyize hanze, hakubiyemo ko hakurikijwe inama ndetse n'icyerekezo byatanzwe n'umukuru w'igihugu.

Ishyirahamwe ry'umupira w'amaguru muri Ghana ryahagaritse ibikorwa byose bijyanye n'amarushanwa ritegura kugeza igihe hazasohokera irindi tangazo riyakomora.

Mu minsi yashize iri shyirahamwe ryari ryatangaje ko imikino ya shampiyona izakomeza ariko hagafatwa ingamba zarimo no kutemerera abafana kujya ku bibuga, imikino ikazajya ibera mu muhezo, ariko Leta yagaragaje ko idashyigikiye iki gitekerezo.

Ghana yiyongereye ku bindi bihugu bitandukanye byamaze guhagarika ibikorwa by'imikino mu bihugu byabo birimo n'u Rwanda.

Impuzamashyirahamwe y'umupira w'amaguru muri Afurika 'CAF', rimaze iminsi muri Cameroon kugirango rikurikirane ubuzima bw'iki gihugu, ubundi hafatwe umwanzuro niba irushanwa rya CHAN 2020 riteganyijwe gutangira mu kwezi gutaha rizaba cyangwa risubitswe.

Ishyirahamwe ry'umupira w'amaguru muri Ghana ryahagaritse ibikorwa by'umupira w'amaguru igihe kitazwi





TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND