Afurika y'Epfo yatangaje ko umuntu wa mbere muri icyo gihugu yasanganywe ubwoko bushya bwa coronavirus, akaba ari umugabo uherutse gusura Ubutaliyani ari kumwe n'umugore we.
Uwo mugabo n'umugore we bo muri Afurika y'Epfo, bafite abana
babiri, bari mu itsinda ry'abantu 10 basubiye muri Afurika y'Epfo bavuye mu
Butaliyani ku itariki ya mbere y'uku kwezi kwa gatatu, nkuko byavuzwe na Zweli
Mkhize, Minisitiri w'ubuzima w'Afurika y'Epfo.
Bwana Mkhize yavuze ko itsinda
ry'abaganga boherejwe mu ntara ya KwaZulu-Natal mu burasirazuba bw'igihugu mu
gutahura abantu bagize aho bahurira n'uwo mugabo n'umuganga.
Mu gihe hari abantu bacye bamaze
gusanganwa coronavirus muri Afurika, leta zo kuri uyu mugabane zabonye umwanya
w'ingenzi w'inyongera wo gutegura ibikoresho byo kuyipima no kuyivura, nkuko
umunyamakuru wa BBC Andrew Harding abivuga.
Ariko hari impungenge z'umwihariko
ko muri Afurika y'Epfo - ha mbere ku isi hari ubwandu bwinshi bwa virusi ya
HIV/VIH itera SIDA - ubwirinzi bw'umubiri bw'abaturage babarirwa muri za
miliyoni bwamaze gucika intege, bushobora gushegeshwa kurushaho n'ubu bwoko
bundi bwa virusi, nkuko uwo munyamakuru wa BBC uriyo abivuga.
Gutahura
abari mu Bushinwa
Abandi bategetsi bo muri Afurika
y'Epfo bavuze ko abandi baturage babiri b'iki gihugu bari bajyanwe mu bitaro mu
Buyapani kubera coronavirus borohewe ndetse bazasubira iwabo vuba aha.
Uwo mugabo n'umugore we bari
bashyizwe mu bitaro mu Buyapani nyuma yo gukurwa mu bwato Diamond Princess
bwari burimo n'abarwaye coronavirus, buparitswe ku cyambu cyo muri icyo gihugu,
bakaba barakoraga muri ubwo bwato.
Mu kwezi kwa mbere, abantu bari muri
ubwo bwato bashyizwe mu kato bwa mbere ubwo umugenzi wabuviriyemo muri Hong Kong
bamusanganaga coronavirus.
Leta y'Afurika y'Epfo yavuze ko iri
"mu cyiciro gikataje" aho ifite gahunda yo gutahura abaturage bayo
bari mu mujyi wa Wuhan mu Bushinwa, uwo mujyi ukaba ari ryo zingiro rya
coronavirus.
Itangazo rya leta y'Afurika y'Epfo
rigira riti: "Abantu bose hamwe 184 bakomoka muri Afurika y'Epfo
bagaragaje ko bashaka gutahukanwa".
TANGA IGITECYEREZO