Kigali

Igitego kimwe kiradushimishije kuko n’iyo tunganya na Etoile de l’Est twari kwishima – Adil Mohammed

Yanditswe na: SAFARI Garcon
Taliki:5/02/2020 15:18
0

Ku wa kabiri w’iki Cyumweru tariki 04 Gashyantare 2020, nibwo hatangiraga imikino ya mbere y’igikombe cy’Amahoro muri uyu mwaka, bigoranye APR FC yabonye amanota atatu biyigoye, ku ntsinzi y’igitego 1-0 batsinze Etoile de l’Est, umusaruro washimishije bikomeye umutoza wa APR FC Adil Mohammed.



Mu mikino yabimburiye indi yo guhatanira igikombe cy’Amahoro 2020, ikipe ya APR FC yatsinze Etoile de l’Est igitego 1-0 ku munota wa nyuma cyatsinzwe na Niyonzima Olivier Sefu wari ugarutse avuye mu mvune, mu mukino wabereye kuri Stade ya Kigali i Nyamirambo.

Ikipe ya Etoile de l’Est yagerageje kwihagararaho mu minota 90 y’umukino, ariko biyinanira gucungana n’iminota micye y’inyongera, irangira binjijwe igitego mu mukino ubanza muri iri rushanwa ry’igikombe cy’Amahoro.

Buri mufana wese ku mpande zombi, iminota 90 y’umukino yarangiye bigaragara ko amakipe yananiranwe agiye kugabana amanota, abafana b’ikipe ya APR FC nubwo begukanye amanota atatu, ntibigeze bashimishwa n’uburyo ikipe yabo yitwaye imbere y’ikipe ikina mu cyiciro cya kabiri.

Aba bafana bumvaga ko APR FC nk’ikipe iyoboye urutonde rwa shampiyona mu cyiciro cya mbere, yakagombye kuba yatsinze ibitego byinshi kandi hakiri kare, iyi kipe yo mu karere ka Ngoma.

Gusa ariko umutoza mukuru wa APR FC Adil Mohammed Erradi siko abibona, kuko kuri we ngo niyo umukino urangira banganyije yari kwiruhutsa agashima Imana.

Yagize ati”Turishimye cyane, iyi kipe yatugoye cyane, yerekanye ko muri Afurika hose ntatandukaniro rihari hagati y’icyiciro cya mbere n’icya kabiri, yakinnye umupira mwiza kandi n’ikipe y’abakinnyi bakiri bato baziranye, kuba tubonye amanota atatu turishimye cyane, kuko n’iyo tunganya twari kwishima”.

Uyu mutoza yakomeje kandi avuga ko abakinnyi be bigaragara ko bananiwe bitewe n’irushanwa n’Intwari bavuyemo banegukanye bagahita bakomereza mu gikombe cy’Amahoro nta karuhuko babonye.

Yagize ati”Bigaragara ko abakinnyi banjye batihutaga mu kibuga, kubera irushanwa ry’Intwari tuvuyemo kandi twanakinnye n’amakipe yose akomeye, ari hejuru ku rutonde rwa shampiyona, gusa ariko biragenda biza bazagaruka mu kibuga bameze neza”.

Umukino wo kwishyura hagati yaya makipe uzabera mu karere ka Ngoma uhishe byinshi ku bakunzi b’umupira w’Amaguru.

Uko imikino yabaye ku wa Kabiri Tariki 04 Gashyantare 2020 yarangiye:

APR FC 1-0 Etoile de l’Est

Mukura VS 2-1 Bugesera

AS Muhanga 5-0 Interforce FC

Espoir FC 0-1 Sunrise

Musanze FC 1-0 Police FC

Gorilla FC 3-1 Marines FC

Imikino iteganyijwe kuri uyu wa Gatatu Tariki 05 Gashyantare 2020:

Rayon Sports FC vs Intare FC (Kigali Stadium, 15h:00’)

SC Kiyovu vs AS kigali (Mumena Stadium, 15h:00’)

Rutsiro FC vs Pepiniere FC (Rutsiro Pitch, 15h:00’)

Impeesa FC vs Etincelles FC (Camp Kigali, 15h:00’)

ASPOR LTD vs Vision FC (Shyorongi Pitch, 15h:00’)

Rwamagana FC vs Gicumbi FC (Ikibuga cya Police i Rwamagana , 15h:00’)


Adil avuga ko Etoile de l'Est yari ku rwego rwiza n'iyo banganya bari gushima Imana


Etoile yari yazengereje APR FC mu minota 90 y'umukino


Wari umukino ukomeye cyane


Umukino warangiye APR FC itsinze igitego kimwe ku busa





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND