RFL
Kigali

OMS iratangaza ko ubu isi iri mu bihe bidasanzwe kubera Coronavirus

Yanditswe na: Liliane Kaliza
Taliki:31/01/2020 10:54
0

Ishami ry'umuryango w'abibumbye ryita ku buzima, OMS/WHO,riratangaza ko ubu isi iri mu bihe bidasanzwe kubera virus ya Coronavirus ikomeje gukwirakwira hirya no hino



Tedros Ghebreyesus, uyobora OMS yavuze ati ati: "Impamvu nyamukuru yo gutangaza ibi si ibiri kubera mu Bushinwa ahubwo ni ibiri kuba no mu bindi bihugu".

Impungenge ziriho ni uko iyi ndwara ishobora kugera mu bihugu bifite ubuvuzi budateye imbere.

Umuryango w'ibihugu bigize Africa y'iburasirazuba, EAC, wasabye ibihugu biwugize kuba maso bikitegura guhangana n'iyi virus.

Ni mu gihe u Rwanda rwatangiye gusuzuma abantu banyura ku kibuga cy'indege mpuzamahanga

Ndetse abanyarwanda basabwa kwirinda kujya mu ntara ya Hubei irimo umujyi wa Wuhan ufatwa nk'izingiro ry'iyi ndwara.

Ibikorwa nk'ibi byo kwitegura no kwirinda birakorwa n'ibindi bihugu byo mu karere.

Mu kiganiro n'abanyamakuru i Geneve, Bwana Tedros yavuze ko iyi virus "ari icyorezo kidasanzwe" ariko "kiri kurwanywa mu buryo budasanzwe".

Yashimye umuhate n'ingamba za leta y'Ubushinwa mu kurwanya iyi virus, avuga ko abona nta mpamvu yo kugabanya cyangwa kubuza abantu kujya mu Bushinwa.

Gusa ibihugu nka Leta zunze ubumwe za Amerika zabujije abaturage bazo kujya mu Bushinwa.

Muri Amerika kandi ejo kuwa kane abashinzwe ubuzima bemeje ko babonye umuntu wa mbere wanduye iyi ndwara atarageze mu Bushinwa ayivanye ku wahavuye.

Naho Uburusiya bwamaze gufunga umupaka wabwo wose n'Ubushinwa.

Mu Bushinwa iyi ndwara imaze guhitana abantu 213, abantu hafi 10,000 bamaze kuyandura.

OMS ivuga ko hari abantu 98 mu bihugu 18 ku isi bamaze kuyandura, gusa ntawe irahitana hanze y'Ubushinwa.

Ibihugu na kompanyi zinyuranye biri guhagarika no kugabanya ingendo n'ibikorwa mu Bushinwa.

Kompanyi nka Google, Ikea, Starbucks na Tesla zafunze ibikorwa byazo mu Bushinwa.

Gutangaza ko isi yinjiye mu bihe bidasanzwe biba bigamije kongera umuhate mu gukumira no kurwanya icyorezo kidasanzwe;

Inshuro eshanu mu bihe bishize nibwo OMS yatangaje ko isi yinjiye mu bihe bidasanzwe by'ubuzima;

Ibicurane by'ingurube, 2009 -Icyo gihe Virus ya H1N1 yakwiriye ahayuranye ku isi yica abantu 200,000.

Imbasa, 2014 - Nubwo yari hafi gucika ku isi mu 2012, imibare yayo yarazamutse cyane mu 2013 maze OMS itangazo iyi ngingo.

Zika, 2016 - OMS yatangaje ko Zika yashyize isi mu kaga mu gihe yariho ikwirakwira cyane muri Amerika y'epfo.

Ebola, 2014 na 2019 - Bwa mbere ni mu 2014 ubwo abantu 30,000 bayanduraga muri Afurika y'Iburengerazuba 11,000 ikabica. Ubuheruka ni umwaka ushize igihe yacaga ibintu muri DR Congo.

Src: BBC

 





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND