RFL
Kigali

Polisi na EAP babeshyuje The Ben wavuze ko igitaramo cya East African Party cyari kigiye gufungwa

Yanditswe na: Muvunyi Arsene
Taliki:2/01/2020 14:56
0

Umuhanzi The Ben wari watumiwe nk’umushyitsi w’imena mu gitaramo cyo gutangira umwaka wa 2020 cya East African party, yatangaje ko yari agiye gutaha ataririmbiye abakunzi be bitewe n'uko cyari kigiye gufungwa na Polisi, ahita anyomozwa na Polisi n'abateguye iki gitaramo.



Igitaramo cya East African Party ku nshuro ya 12 cyabereye muri Kigali Arena aho abantu ibihumbi bari buzuye muri iyi nyubako basusurukijwe n’abahanzi bakunzwe mu Rwanda barimo Andy Bumuntu, King James, Butera Knowless, Bushali, Riderman, Bruce Melodie na The Ben uba muri Leta Zunze ubumwe z’Amerika.

Ni igitaramo cyaranzwe n’ibyishimo byo ku rwego rwo hejuru abakunzi b’umuziki bahawe n’abahanzi cyane cyane Bushali , The Ben na King James.

Bitewe n’uburyo igitaramo cyatangiye gitinze n’uburyo abahanzi bahawe umwanya munini bakaririmba bisanzuye, byatumye i saa sita z’ijoro igitaramo gifungirwa zigera ari bwo Bruce Melodie akigera ku rubyiniro kandi yagombaga gukurikirwa na The Ben.

Mu butumwa The Ben yanyujije kuri Twitter yavuze ko yagiye ku rubyiniro yacitse intege kuko yari yamaze kubwirwa ko igitaramo kigiye gufungwa na Polisi.

Yagize ati “Nagiye ku rubyiniro maze kubwirwa ko polisi igiye gufunga. Mu by’ukuri byangabanyirije imbaraga ariko nagerageje kwihagararaho. Nari nahawe iminota buri uko indirimbo yarangiraga nabaga mfite impungenge z’uko nkurwa ku rubyiniro igihe icyo ari cyose ariko icy’ingenzi ni uko twabikoze neza mu ijoro ryashize.”

The Ben yaririmbye indirimbo ze zose yari yateguye mu gihe cy’isaha irengaho iminota 10 ndetse ashimisha abakunzi ku rwego rwo hejuru.

Polisi y'u Rwanda nayo ibinyujije kuri Twitter yavuze ko itigeze igira igitekerezo cyo gufunga igitaramo cya East African Party, ahubwo ko uwabibwiye The Ben yaba yayibeshyeye.

"Polisi y'u Rwanda ntabwo yigeze ifunga igitaramo, abateguye igitaramo cya ninjoro n'umuhanzi The Ben ni bo bagomba gusobanurira abakunzi babo ikibazo bahuye nacyo n'impamvu babeshye polisi." Biri mu byo banditse kuri Twitter.

East African Promoters bateguye iki gitaramo nabo bihakanye The Ben bavuga ko impamvu bamwihutishaga ari uko amasaha yari yakuze ariko ibyo kuba Polisi yari igiye kubafungira ntabyo bamubwiye.

"Nyuma y'uko amasaha yari akuze umuhanzi The Ben tukamushyira ku rubyiniro hutihuti, turanyomoza ibyo yatangaje ko ari Polisi y'u Rwanda yamuhagaritse. NZi EAP (Abateguye igitaramo) twamusabaga gusoza igitaramo vuba kugira ngo twubahirize igihe kuko abantu bari batangiye gutaha."

The Ben yongeye kwisegura avuga ko abantu bamwumvise nabi ahubwo ari uko amasaha yari akuze, aboneraho ashima Polisi uburyo yabacungiye umutekano kugeza batashye.

The Ben wari utaramye muri East African Party ku nshuro ya kabiri, iyo akurwa ku rubyiniro yari kuba akurikiye Meddy wakuweho atarangije kuririmba ubwo yaririmbaga mu gitaramo cyo Kwita Izina cyari cyatumiwemo umuhanzi Ne-Yo muri Nzeri 2019.

Byari kuba kandi ari ubwa kabiri bimubayeho kuko no mu 2009 ubwo yamurikaga alubumu ye ya mbere igitaramo cye cyafunzwe kitarangiye kubera ibibazo byari byakuruwe n’umubyigano w’abafana.

The Ben ngo yaririmbye afite impungenge z'uko akurwa ku rubyiniro





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND