Kigali

Tania Muvunyi wahagarariye u Rwanda muri Miss Africa Calabar 2019 ngo yatunguwe no kubura muri batanu ba mbere

Yanditswe na: Muvunyi Arsene
Taliki:30/12/2019 9:38
0

Umutoni Muvunyi Tania wahagarariye u Rwanda mu irushanwa rya Miss Africa Calabar avuga ko yatunguwe no kuba ataragaragaye mu bakobwa batanu ba mbere bitewe n’uburyo yitwaye mu irushanwa ryose.



Ku wa Gatanu tariki 27 Ukuboza 2019 ni bwo hasojwe irushanwa rya Miss Africa Calabar ryaberaga muri Nigeria muri Leta ya Cross River. Iri rushanwa ryegukanywe n’umukobwa wo muri Kenya witwa Irene Ng’endo Mukii akurikirwa n’ibisonga bye [Daniella Lopes  na  Ethel Maimela].

Uwabaye Miss Africa Calabar 2019 yahembwe imodoka n’ibihumbi $35 mu gihe igisonga cya mbere cyahembwe ibihumbi $10 naho icya kabiri kigahembwa ibihumbi $5.

Mutoni Muvunyi Tania wari uhagarariye u Rwanda yatahiye aho kuko atabashije kugaragara no mu bakobwa batanu ba mbere bitwaye neza.

Mu kiganiro yagiranye na INYARWANDA, Tania Muvunyi yavuze ko yatunguwe n’ibyavuye mu irushanwa kuko yari yiteze ko  byibuze azagaragara mu bakobwa batanu ba mbere.

Ati “Nabanje gutungurwa kuko nari niteze ko nzaba mu bakobwa batanu ba mbere kuko nahagarariye u Rwanda neza 100%.”

Icyizere cy’uko yari kuba muri batanu ba mbere avuga ko yagishingiraga ku buryo yitwaye mu mwiherero kandi yasubizaga neza n’ibibazo yabazwaga n’abagize akanama nkempurampaka.

Ati “Nitwaye neza mu mwiherero, mu biganiro byaberega mu matsinda nabaga nshabutse, nasubizaga neza bigatuma nigirira icyizere. Nerekanye indangagaciro z’umunyarwandakazi.”

Tania Muvunyi avuga ko muri iri rushanwa yungukiyemo inshuti zifuza no gusura u Rwanda, kumenya kuvugira mu ruhame n’ibindi bitandukanye.

Hari ku nshuro ya kane iri rushanwa riba bikaba ku nshuro ya gatatu u Rwanda ruryitabiriye. Uretse Fiona Muthoni Naringwa wabaye igisonga cya mbere mu 2017 nta wundi mu nyarwandakazi urabasha kuribonamo igihembo. 

Tania Muvunyi avuga ko yatunguwe n'ibyavuye mu irushanwa

Tania Muvunyi yumvaga yaba mu bakobwa batanu ba mbere


Irene Ng'endo niwe wabaye Miss Africa Calabar 2019





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND