RFL
Kigali

Ubususuruke mu gitaramo cyo gushima Imana cya Bright Five Singers-AMAFOTO

Yanditswe na: Muvunyi Arsene
Taliki:11/11/2019 10:04
0

Abaririmbyi bahuriye mu itsinda rya Bright Five Singers bashimishije abakunzi b’umuziki wabo mu gitaramo cyabo cyo gushima Imana ibyiza yabakoreye mu myaka ine bamaze cyabaye kuri iki Cyumweru.



Bright Five Singers bageze ku rubyiniro saa kumi n'ebyiri zirenzeho iminota 40, ari abasore batandatu (bane baririmba na babiri bacuranga) bambaye kositimu z'ibara ry'ivu. Babanje kunamira abari baje mu gitaramo cyabo ubundi bahera ku ndirimbo yitwa Lords Prayer.

Abari mu gitaramo bari batuje cyane ubona bashaka kumva neza indirimbo kuruta kuba baganira, bakomaga amashyi ari uko indirimbo irangiye ubundi ukabona bongorerana akanya gato bakongera bagatuza. Bakurikijeho “Ngirira Imbabazi”, “Zakewusi”, “Umushumba Utarumanza”, na “God Will Make a way” igice cya mbere kiba kirarangiye bajya kuruhuka.

Igice cya Kabiri cyafunguwe n’umukobwa w’umurundikazi, Nicole, ufite ubuhanga mu kuririmba mu buryo bwa Opera, maze ahera kuri “Wishing You Were”, Akomereza ku yitwa “Aimer”, afatanya na Karangwa Kwizera Fabrice wo muri Bright Five Singers baririmbana “Perhaps Love”, nyuma afatanya n’itsinda ryose kuririmba “My Heart Will Go On” ya Celine Dion ikaba yishimiwe cyane.

Igice cya kabiri cyasojwe nyuma yo kuririmba indirimbo “Urukumbuzi” y’umuhanzi Mani Martin yishimiwe n’abantu bari buzuye mu cyumba mberabyombi cya Serena Hotel.

Byari ukuva mu buryohe bajya mu bundi kuko igice cya gatatu cyo cyari injyanamuntu! Umuyobozi wa Bright Five Singers, Alain Marius yaririmbye indirimbo mu buryo bwa Opera yitwa “Madamina” yanditswe na Mozart wabayeho mu myaka yo mu 1700. Ijwi ry’uyu musore ririmo ubuhanga ryakuruye abantu bamuha amashyi y’urufaya ndetse bamusaba kuyisubiramo.

Aba basore kandi baririmbye indirimbo zakanyijeho mu bihe byo ha mbere nka “Rwanda Rwiza” ya Augustin Ngabonziza, “Nzoja ku Gasozi” ya Nicolas,  “Umutoni” ya Orchestre Nyampinga ariko bageze ku yitwa “Ngwino Unsange” nayo ya Nyampinga abantu bose bahagurutse bacinya akadiho.

Bajya gusoza bashyizeho indirimbo zitandukanye zo gusingiza Imana zirimo “Dusingize Imana”, “Niba Uhoraho” n’izindi zafashije abantu kubyina bisanzuye.

Bright Five Singers bashimaga Imana ibyo yabakoreye mu myaka ine bamaze bakorana ubutumwa biciye mu ndirimbo basoreje ku ndirimbo yitwa Match-Up maze abantu bataha bigaragara ko banyuzwe ku kigero cyo hejuru. 

REBA NGWINO UNSANGE YISHIMIWE CYANE


Alain Marius yaririmbye Madamina akurirwa ingofero

Abasore ba Bright Five Singers bagaragaje ubuhanga mu kuririmba

Prospere ushinzwe ijwi rya Alto muri Bright Five Singers

Salus Band niyo yacuranze muri iki gitaramo

Bright Five Singers bamaze imyaka ine baririmba

Kizito Mihigo ari mu bitabiriye iki gitaramo

Abihaye Imana batandukanye bitabiriye iki gitaramo

Bamwe bagiye mu mwuka

Bizihiwe bacinya akadiho

Byari ibyishimo gusa ku bitabiriye iki gitaramo

REBA ANDI MAFOTO yafashwe na Mugunga Evode/ Inyarwanda Art Studio






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND