Rwamagana-Kigali: Prosper Nkomezi yanditse amateka! Igitaramo cye cya mbere cyitabiriwe cyane ndetse gihembura benshi-AMAFOTO

Prosper Nkomezi ni umusore w’imyaka 24 y’amavuko umaze imyaka ibiri gusa mu muziki. Kuririmba yabitangiriye i Rwamagana muri Zion Temple ari naryo torero ryamureze. Umuhanzi wo hanze y'u Rwanda yigiraho byinshi ni Benjamin Dube utegerejwe mu Rwanda tariki 11/08/2019 mu gitaramo cya True Promises, naho mu Rwanda ni Gentil Misigaro na Aime Uwimana. Prosper ni imibiri yombi, afite igara rito. Ni umusore ucisha macye. Amashuri abanza kimwe n’ayisumbuye, yayigiye muri Repubulika Iharanira Demokarasi ya Congo. Mu mashuri yisumbuye yize Imibare n’Ubugenge (Math-physique). Uyu mwaka ni bwo yifuza gutangira kaminuza. Yirunduriye mu muziki wo kuramya Imana ndetse yifuza kuwukora nk'umwuga.

Prosper Nkomezi afite inzozi zo kuba umuhanzi ukomeye ku rwego rw'isi

Muri 2017 ni bwo Prosper Nkomezi yakoze indirimbo ye ya mbere yise 'Sinzahwema', iyo abantu benshi bazi nka 'Amamara'. Nyuma yayo yakoze izindi zinyuranye, zirakundwa cyane aho twavugamo; Humura, Ibasha gukora, Singitinya, Urarinzwe, Nzayivuga n'izindi. Uyu muhanzi tubasobanuriye rero haruguru, yaraye akoze igitaramo cy'amateka yise 'Ibasha Gukora Live Concert' cyabaye kuri iki Cyumweru tariki 07/07/2019 kibera mu ihema rya Kigali Serena Hotel kuva saa kumi z'umugoroba kugeza saa tatu z'ijoro. Ni cyo gitaramo cya mbere akoze kuva atangiye umuziki mu myaka ibiri ishize, gusa nanone si cyo cya nyuma akoze na cyane ko yifuza kuba umuhanzi uri ku rwego mpuzamahanga.

Prosper Nkomezi yifuza kuba umuhanzi uri ku rwego rw’isi

Mu Ukuboza 2018 Prosper Nkomezi yabajijwe na Inyarwanda.com urwego yifuza kugeraho mu muziki we, adusubiza muri aya magambo, ati: “Nifuza ko Prosper mu gihe kiri imbere azaba ari umuhanzi uri ku rwego rw’isi,..abumva ikinyarwanda n’abatacyumva bakabasha guheshwa umugisha n’ibihimbano Imana izaba yancishijemo hakaba n’abantu bazakira yaba indwara, yaba ikindi kintu icyo ari cyo cyose binyuze mu butumwa bwiza ndirimba.” Abajijwe igihe yumva izo nzozi ze zizasohorera, yagize ati: “Bizaba vuba, si cyera, sinavuga umwaka, ariko yaba ejo yaba mu myaka ibiri, Imana irashoboye kubikora.” Twamubajije icyo yumva kizamufasha kugera kuri izo nzozi, adusubiza agira ati: “Ni ugukora cyane no kubisengera.”

Prosper Nkomezi yasutse amarira y'ibyishimo mu gitaramo cye

Iki gitaramo cya mbere cya Prosper Nkomezi cyaranzwe no guhembuka kw'imitima ya benshi ndetse n'ubwitabire bwo ku rwego rwo hejuru dore ko intebe zateguwe mu ihema ryabereyemo iki gitaramo zari zuzuye, abandi bahagaze. Ni mu gihe kwinjira byari byihagazeho dore ko ku muryango amatike yaguraga 5000 Frw mu myanya isanzwe, 10,000 Frw muri VIP ndetse na 15,000 Frw muri VVIP. Muri iki gitaramo Prosper Nkomezi yari ari kumwe na Alarm Ministries, Healing Worship Team, Bosco Nshuti, Serge Iyamuremye na Simon Kabera. Mu bantu b'amazina azwi bitabiriye iki gitaramo twavugamo; Israel Mbonyi, Patient Bizimana, Alain Numa (MTN Rwanda), Gaby Kamanzi, Rene Patrick, Phanny Wibabara (MTN Rwanda), Aline Gahongayire, Anita Pendo, Epa Ndungutse, The Pink n'abandi.

Bahembukiye muri 'Ibasha Gukora Live Concert'

Abitabiriye iki gitaramo bahagiriye ibihe byiza mu kuramya Imana basubizwamo imbaraga n'insanganyamatsiko y'iki gitaramo ivuga ko 'Imana ibasha gukora ibirenze ibyo abantu bibwira'. Ibi byaje gusobanurwa neza na Pastor Christophe wigishije ijambo ry'Imana aho yikije ku magambo avuga ko 'Imana ibasha gukora ibirenze ibyo abantu batekereza kandi ikabikora mu gihe cyayo nta muntu igishije inama." Prosper Nkomezi yishimiwe cyane biba agahebuzo ubwo yaririmbaga 'Ndi umutsinzi', indirimbo ye itari yajya hanze, iyi akaba ari yo ndirimbo yaririmbye bwa nyuma aho yahaye umwanya abaririmbyi be nabo bakayiririmba buri umwe mu ijwi rye.

Diane (True Promises/Healing WT) ubwo yategara indirimbo ya Prosper

Saa kumi n'imwe n'iminota 27 ni bwo Prosper Nkomezi yahamagawe kuri stage, abari muri salle bakoma amashyi y'urufaya, ibyagaragaje ibyishimo bari batewe no kwakira uyu muhanzi wari ukoze igitaramo cye cya mbere. Abacuranzi nabo bahise bacuranga umuziki uteguza abantu uyu musore, uyu muziki ukaba wamaze iminota 10 Prosper Nkomezi atari yagera kuri stage. Saa Kumi n'imwe na 37 ni bwo Prosper yageze kuri stage, ibyishimo biba byinshi ku bakunzi b'uyu muhanzi. Ijambo rya mbere yavuze akigera kuri stage yagize ati "Haleluya, Haleluya, Haleluya" iri jambo ubusanzwe rirasobanura ngo 'Imana ishimwe'. Yahise ahera ku ndirimbo ye 'Singitinya', akurikizaho 'Hazaba', 'Nzayivuga', 'Humura' n'izindi.

Prosper Nkomezi yaje gushimira abantu bose bitabiriye igitaramo cye ati "Imana ibahe umugisha ko mwaje". Yavuze uburyo se yamwigishije kwizera akajya amwohereza ku ishuri nta mafaranga y'ishuri aratanga, se akamubwira ko 'Imana ibasha gukora ibyo abantu bibwira', kandi koko bikaba uko. Yasabye abari mu gitaramo cye kudahangayikira iby'ejo kuko Imana ariyo ibigena. Yabasabye kandi kwizera Imana bakayihanga amaso kuko ibisigaye ari yo izabyikorera. Prosper Nkomezi yashimye Imana yemeye ko akora iki gitaramo, aha ni ho yatangarije ko mbere y'ibyumweru bitatu ngo igitaramo cye kibe, yakoze impanuka ariko Imana ikinga ukuboko. Yasomye amagambo ari mu Abefeso 3:20 avuga ko Imana ibasha gukora ari yo yazanye abantu bari mu gitaramo cye.

Prosper Nkomezi si umuhanzi gusa ahubwo ni n'umuvugabutumwa dore ko mu gitaramo cye yananyuzagamo akabwiriza. Ubwo yaririmbaga indirimbo ye 'Urarinzwe', yakomeje benshi ababwira ko nubwo bari mu bihe bikomeye, barinzwe n'Imana iri mu ruhande rwabo. Asobanura insanganyamatsiko y'igitaramo cye 'Ibasha gukora live concert', yagize ati "Hari igihe Imana igusezeranya ukagira ngo yaribagiwe, imiryango ishobora kuba ntacyo yagufashije kugeraho ariko Imana ni yo imenya ibidukwiriye. Ushobora gusaba Imana inzu, ikabona atari yo igukwiriye ako kanya, ikazayiguha nyuma,.." 

Benshi bakozweho n'indirimbo za Prosper Nkomezi, batura amagambo y'ubuhanuzi kuri uyu muhanzi. Simon Kabera ubwo yari amaze kuririmba yavuze ko Prosper Nkomezi afite umugisha ukomeye bityo imbere he mu muziki akaba ari heza cyane. Yamutangiye ubuhamya avuga ko baganiriye, aza gusanga ari umukozi w'Imana. Pastor Tom Gakumba wari Mc muri iki gitaramo, yanezerewe biramurenga agabira Prosper Nkomezi inka igura ibihumbi 300 by'amanyarwanda. Yavuze ko azamuha amafaranga akajya kuyigurira. Hari n'abandi benshi bitanze barimo C John (Cafe Ark), Gahongayire, Pastor Olivier, Anita Pendo n'abandi. (Ibyo bitanze turabigarukaho mu nkuru yacu ikurikiraho). 

Nyuma y'iki gitaramo Prosper Nkomezi yabwiye Inyarwanda.com ko afite ishimwe rikomeye ku Mana ku bw'igitaramo cye cyagenze neza cyane nk'uko yabyifuzaga. Yavuze ko yashimishijwe cyane n'ubwitabire bw'abantu benshi ndetse anakorwa ku mutima n'umunezero abantu bagiriye mu gitaramo cye. Yagize ati "Nishimye cyane ko Imana iyo ivuze itabeshya kandi ibyo nayisabye muri concert yabikoze. Nashimishihwe cyane nuko abantu baje ari benshi kandi Imana iduha n’umunezero mu gitaramo imitima irabohoka. Uko nabyifuzaga, ni ko yabikoze kbsa."

REBA ANDI MAFOTO Y'UKO BYARI BIMEZE MURI IKI GITARAMO

Prosper Nkomezi yari yambaye umukara kuva hasi kugera hejuru ukuyemo gusa isaha

Basabanye n'Imana binyuze mu ndirimbo za Prosper Nkomezi

Ni igitaramo cyaranzwe n'ibihe bidasanzwe mu kuramya Imana

Abari bayoboye iki gitaramo nabo byabarenze bajya mu mwuka wo kuramya Imana

Pastor Ndizeye Olivier uyobora Zion Temple Ntarama yari yaje gushyigikira Prosper Nkomezi

Israel Mbonyi yitabiriye iki gitaramo anatura amagambo y'ubuhanuzi kuri Prosper Nkomezi ko 'ari umuhanzi mwiza u Rwanda rwungutse'

Muhumure Confiance uri mu bantu ba mbere mu Rwanda bazi gusirimba yatangariye impano iri muri Prosper Nkomezi

Prosper Nkomezi byamurenze asuka amarira y'ibyishimo

Anita Pendo yitabiriye iki gitaramo anitanga amafaranga ibihumbi 50

Diane (True Promises& Healing WT) ari mu baririmbyi bafashije Prosper Nkomezi

Prosper Nkomezi yaje guhindura imyenda akuramo iyirabura yari yambaye hejuru

Pastor Tom Gakumba hamwe na Justin wo muri Alarm Ministries akaba na 'Protocol' wa Israel Mbonyi ni bo bayoboye iki gitaramo

Pastor Tom yavuze ko yasize umwana we ari mu bitaro yanga gutenguha Prosper Nkomezi wari wamusabye kuzamuyoborera igitaramo. Yavuze ko amavuta yari ari muri iki gitaramo agomba kumukiriza umwana

Aline Gahongayire yitabiriye iki gitaramo yitanga kuzagurira Prosper Nkomezi icyayi cy'amadorali 50 y'Amerika

Ababyeyi ba Prosper Nkomezi bitabiriye igitaramo cy'umuhungu wabo

Serge Iyamuremye yaririmbye muri iki gitaramo

Alain Numa mu gitaramo cya Prosper Nkomezi

Simon Kabera yaririmbye muri iki gitaramo anatanga ubuhamya bw'imirimo ikomeye Imana yamukoreye

Prosper Nkomezi hamwe na bamwe mu baririmbyi b'intyoza mu miririmbire bamufashije muri iki gitaramo

Igitaramo cyasojwe abantu bakinyotewe no kuramya Imana

KANDA HANO UREBE ANDI MAFOTO MENSHI

IKIGANIRO PROSPER NKOMEZI YAGIRANYE NA INYARWANDA TV

AMAFOTO: Cyiza Emmanuel (Inyarwanda Art Studio)

VIDEO: Eric Niyonkuru (Inyarwanda Tv)