Kigali

Itariki Don Moen azagera i Kigali yatangajwe, amatike azazamurwa ku munsi w’igitaramo

Yanditswe na: UDAHOGORA Vanessa Peace
Taliki:31/01/2019 18:15
0

Umuramyi w’umunyamerika Don Moen w’imyaka 68 watsindiye ibihembo bikomeye mu muziki , byemeje ko azagera mu Rwanda ku wa Gatandatu tariki 09 Gashyantare 2019 ku isaha ya saa munani (14h:00’) z’amanywa.



Don Moen ategerejwe mu Rwanda aho azaririmba mu gitaramo gikomeye ‘MTN Kigali Praise Fest Edition I’ azahuriramo na Israel Mbonyi, Dinah Uwera, Columbus, DJ Spin, DJ Shawn ndetse n’itsinda ry’abaramyi Aflewo.

Eliud ushinzwe kumenyekanisha ibikorwa muri RG-Consult inc yafatanyije na sosiyete y’itumanaho mu Rwanda MTN batumira Don Moen, yatangarije INYARWANDA ko uyu muhanzi wubashywe azagera i Kigali ku wa Gatandatu tariki 09 Mutarama 2019, ku isaha ya saa munani z’amanywa. Yavuze kandi ko saa kumi kuri uwo munsi hateganyijwe ikiganiro n’abanyamukuru kizamara amasaha abiri.

MTN RWANDA

Ushobora kugura itike ukoresheje na MTN Mobile Money

Yongeyeho ko amatike azazamurwa nyuma y’itariki 09 Mutarama 2019. Yagize ati “Ubu amatike mu myanya isanzwe ni 12,000 Frw, mu myanya y’icyubahiro ni 25,000 Frw naho ku meza y’abantu umunani ni 250,000 Frw.  Ku munsi w’igitaramo amatike mu myanya isanzwe (Ordinary) bizaba ari 15,000 Frw, mu myanya y’icyubahiro (VIP) ni 30,000 Frw, mu gihe ku meza y’abantu umunani (VVIP Table of 8)  bizaba ari 300,000 Frw.

Don Moen amaze gukora indirimbo zirenga 100, yageze ku migabane itandukanye ahakorera ibitaramo bikomeye. Mu rugendo rwe rw’umuziki yakoranye n’abahanzi batandukanye barimo  Claire Cloninger, Paul Overstreet, Martin J Nystrom, Randy Rothwell, Ron Kenoly, Bob Fitts, Debby Graafsma, Paul Baloche, Tom Brooks, Lenny LeBlanc n’abandi.

Don Moen azaririmba i Kigali avuye muri Uganda mu gitaramo azahuriramo n’abahanzi barimo Wilson Bugembe, Sandra Suubi, Levixone, Watoto Children’s Choir, Brian Lubega, KPF Voice, DJ Twonjex ndetse na Exodus.






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND