Ikipe ya APR VC niyo yabanje kubona iseti ya mbere ku manota 25-18, yashyizemo ikinyuranyo cy’ amanota 7 yose. Ikipe ya Rayon Sports yari yagowe n’ iseti ya mbere kuko yari itarinjira neza mu mukino, ntiyacitse integer na gato kuko nayo yahise itsinda iseti ya kabiri ku manota 25-18, bisa nibyo mukeba wayo APR yari imaze kuyikorera.
Sitade yari yakubise yuzuye abafana mu mande zose
APR yongeye ihita itsinda iseti ya kabiri yari iya gatatu muri uyu mukino ku manota 25-16, Rayon Sports nayo yahise yongera itsinda iya kane ku manota 25-16. Nyuma yo kunganya amaseti 2-2 byabaye ngombwa ko hitabazwa iseti ya gatanu iba igizwe n’amanota 15, iyi seti yaje kwegukanwa na Rayon Sports ku manota 15-12, ihita inegukana igikombe.
Rayon Sports yari yabashije kugera ku mukino wa nyuma nyuma yo gusezerera ikipe ya INATEK naho ikipe ya APR nayo igera ku mukino wa nyuma isezereye Nemo Stars yo mu gihugu cya Uganda, umukino wagoye cyane APR ndetse biyiviramo kuvunikisha umukinnyi wayo ukomeye Yakana Laurence.
Agahinda kari kose ku bakinnyi b' ikipe ya APR VC
Byari ibyishimo ku bakinnyi n' abafana ba Rayon Sports
Nyuma yo gutsinda uyu mukino umutoza w’ ikipe ya Rayon Sports Nyirimana Fidele yatangaje ko uyu mwaka bari bihaye intego ndetse zimwe na zimwe bakaba batangiye kuzigeraho n’ ubwo we abona ko bagifite urugendo rurerure.
Umwaka ushize ikipe ya Rayon Sports VC yari yegukanye iri rushanwa ryo kwibuka abakinnyi n’abakunzi b’ umukino w’ intoki wa Volleyball bishwe muri Jenoside yakorewe Abatutsi mu 1994, itsinze APR VC amaseti 3-0, n’ ubu ikaba yongeye kuyisubira imbere y’ imbaga y’ abafana bari baje kwihera ijisho uyu mukino utari woroshye na gato.
Ikipe ya Rayon Sports VC ikaba yahise ishyikirizwa igikombe giherekejwe n’ amafaranga ibihumbi Magana atanu y’ u Rwanda.