Duarte Marivoet yegukanye agace ka Gatanu ka Tour du Rwanda ya 2025

Kuri uyu wa Gatanu tariki ya 28 Gashyantare 2025 ni bwo Tour du Rwanda yakomeje ku munsi wayo wa Gatandatu hakinwa agace ka Gatanu kavaga i Rusizi kerekeza i Huye ku ntera y'ibilometero 144.

Ni nyuma yuko Umufaransa Joris Delbove ukinira Ikipe ya TotalEnergies ariwe wegukanye Agace ka Kane ka Tour du Rwanda 2025 kakinwe ejo kavaga i Rusizi kerekeza i Karongi ku ntera y'ibilometero 95,1 ndetse ahita anambara umwambaro w'umuhondo.

Agace k'uyu munsi katangiye abakinnyi babanza kugenda ibilometero 4,1 bitabarwa. Isiganwa nyakuri rigitangira Umunya-Eritrea Yemane Dawit yagerageje kuva mu gikundi agenda wenyine gusa ntibyatinda ahita afatwa.

Bageze ku kilometero cya 5 Muhoza Eric (Team Amani), Berlin (Bike Aid), Schutte (Afurika y'Epfo), Kibrom (Eritrea), Gidey (Ethiopia), Taha (CMC) na Hailemaryam (Ethiopia) bavuye mu bandi bajya imbere y'igikundi.

Umunya-Ethiopia Gereziher Geremedhin Hailemaryam niwe waje kwegukana amanota y'Umusozi wa Mbere yatangiwe i Giheke naho Antoine Berlin ukinira Ikipe ya Bike Aid, yegukana amanota y'Umusozi wa Kabiri yatangiwe mu Gisakura.

Ba bakinnyi 5 bakomeje kuba imbere ndetse hari n'aho bageze bashyiramo ikinyuranyo cy'iminota 7 n'amasegonda 30.

Antoine Berlin ukinira Bike Aid, yegukanye amanota y'Umusozi wa Gatatu yatangiwe muri Nyungwe.

Intera yari yashyizwemo na Muhoza Eric (Team Amani), Berlin (Bike Aid), Schutte (Afurika y'Epfo), Kibrom (Eritrea), Gidey (Ethiopia), Taha (CMC) na Hailemaryam (Ethiopia) yagiye igabanywa n'igikundi.

Muhoza Eric wa Team Amani yaje kuva mu bandi bakinnyi batanu bari kumwe imbere ajya imbere ndetse aba ari nawe wegukana amanota y'ahatambika yatangiwe i Nyamagabe.

Abakinnyi babiri, Brady Gilmore na Duarte Marivoet baje kuva mu gikundi bajya imbere basiga Muhoza Eric ndetse we birangira anafashwe n'igikundi.

Mu bilometero 10 bya nyuma Umubiligi Duarte Marivoet w'imyaka 20, ukinira Ikipe ya UAE yagiye imbere birangira ari nawe wegukana agace k'uyu munsi akoresheje amasaha 4, iminota 5 n'isegonda 1.

Abanyarwanda baje hafi ni Masengesho Vainqueur waje kumwanya wa 9 ndetse na Manizabayo Eric (Java-Inovotec) waje kumwanya wa 13 aho bose barushwa amasegonda 25 n'uwa Mbere.

Umufaransa Joris Delbove wa TotalEnergies, ni we wakomeje kwambara umwambaro w'umuhondo. Abanyarwanda baza hafi ku rutonde rusange ni Masengesho Vainqueur uri kumwanya wa 8 aho arushwa amasegonda 29 n'uwa Mbere na Manizabayo Eric uri kumwanya wa 10 aho we arushwa amasegonda 44.

Tour du Rwanda ya 2025 izakomeza ku munsi wejo kuwa Gatandatu hakinwa agace ka Gatandatu kazahagukurikira i Nyanza kagasorezwa mu mujyi wa Kigali kuri Canal Olympia ku ntera y'ibilometero 114.

Duarte Marivoet wegukanye agace ka Gatanu ka Tour du Rwanda 

Ubwo abasiganwa bageraga i Gisakura bakiriwe n'abahinzi b'icyayi