Urutonde rw’indimi Eshanu zikoreshwa kurusha izindi ku Isi

Ku mwanya wa mbere hari Icyongereza (English):

Icyongereza ni ururimi rukoreshwa ku Isi yose, rukaba rukoreshwa n’abagera kuri Miliyari 1.4. Uru ni ururimi nyamukuru mu bucuruzi, siyansi, uburezi, ndetse no mu ikoranabuhanga. Icyongereza gifite imbaraga nyinshi mu itumanaho rya buri munsi, ndetse kibarwa nk'ururimi mpuzamahanga mu bigo by'ubucuruzi n'imiryango mpuzamahanga.

 Ku mwanya wa Kabiri hari Igishinwa (Mandarin Chinese)

Igishinwa gikoreshwa n'abantu barenga Miliyari 1.1. Ni ururimi rwa mbere mu gihugu cy’u Bushinwa, aho Ubushinwa ari igihugu gifite abaturage benshi, kandi gifite umwanya ukomeye mu rwego rw’ubukungu kubera ubushobozi bw’u Bushinwa mu bucuruzi no mu nganda.

 Ururimi rwa Gatatu ni Igihinde (Hindi)

Igihinde kirasanzwe mu gihugu cy’u Buhinde, kikaba gikoreshwa n’abagera kuri Miliyoni 600. Ni ururimi rukomeye cyane mu karere k’Aziya y’Epfo, aho Abahinde benshi barukoresha nk’ururimi rwabo rwa buri munsi.

 Ururimi rwa Kane ni Icyesipanyore (Spanish)

Icyesipanyore gikoreshwa n’abantu Miliyoni 560, cyane cyane mu bihugu byo muri Amerika y'Epfo n'u Burayi. Ni ururimi rukora mu buryo bwinshi, ndetse rugakoreshwa nk’ururimi rw’itumanaho mu nzego nyinshi z'ubuzima.

 Ku mwanya wa Gatanu ari naho tugarukira hari ururimi rw’Igifaransa (French)

 Igifaransa kibarwa nk’ururimi rukoreshwa n’abantu barenga Miliyoni 300 ku isi. Gikoreshwa cyane mu bihugu byinshi bya Afurika, u Burayi ndetse na Amerika, kikaba ari ururimi rw'itumanaho mu bigo by’ubutwererane mpuzamahanga.

Izi ndimi zose zitanga amahirwe akomeye mu bijyanye n’ubukungu, itumanaho, ndetse no mu bikorwa by’ubutwererane mpuzamahanga.

Kuba umuntu ashobora kumenya zimwe muri izi ndimi bikunze kubafasha mu kubona amahirwe mu kazi, uburezi ndetse no mu bindi bikorwa bya buri munsi. Indimi nk'Icyongereza ni rumwe mu ndimi zifatika muri gahunda nyinshi mpuzamahanga.

 Icyo wamenya ni uko ururimi rwose rufite umwihariko warwo, kandi abantu benshi bashobora kugira uruhare runini mu gusakaza no guteza imbere izi ndimi ku rwego mpuzamahanga.

Kuba uzi indimi nyinshi bituma ubaho mu buryo bwagutse ndetse bikagufasha gusobanukirwa no kuganira neza n’abaturage bo mu bihugu bitandukanye. Niyo mpamvu byaba byiza kugerageza kwiga zimwe muri izi ndimi kugira ngo wunguke ubumenyi bwagutse kandi ubashe gukorana n’abantu benshi bo mu bice bitandukanye by'Isi nk'uko bitangazwa na Visual Capitalist dukesha iyi nkuru.

Umwanditsi: KUBWIMANA Solange