FIFA yemeje ahazabera igikombe cy'Isi cya 2030 na 2034

Ibi byemerejwe mu nama y'intekorusange ya FIFA yabaye kuri uyu wa Gatatu taliki ya 11 Ukuboza 2024 ikana yabereye mu murwa mukuru wa Thailand, Bangkok.

FIFA yemeje ko igikombe cy'Isi cya 2026 kizabera muri Leta Zunze Ubumwe z'Amerika, Canada na Mexico naho icya 2030 kikaba kizakirwa na Portugal, Espagne na Morocco ndetse n'igihugu cya Argentine, Paraguay na Uruguay bizakira imikino 3 ifungura mu rwego rwo kwizihiza imyaka 100 ishize hakinwa igikombe cy'Isi.

Impamvu ibi bihugu 3 ari byo byatoranyijwe ni ukubera ko Paragway ari cyo gihugu cya mbere cyakiriye igikombe cy'Isi ndetse gihita kinagitwara gitsinze Argentine ku mukino wa nyuma naho muri Paraguay ho ni ho haba icyicaro gikuru cy'impuzamashyirahamwe y'umupira w'amaguru muri Amerika y'Epfo.

Umukino ufungura uzakinirwa muri Estádio Centenário y'i Montevideo yakiniweho umukino wa mbere w'Igikombe cy'Isi mu 1930. 

Nyuma y'iyi mikino 3 indi mikino izahita ikomereza muri Morocco, Portugal na Espagne. Ubwo bivuze ko igikombe cy'Isi cya 2030 kigomba kuzabera ku Mugabane wa Afurika, u Burayi ndetse no muri Amerika y'Epfo.

Ibi ni ubwa mbere bizaba bibayeho mu mateka y'igikombe cy'Isi kandi ibi bihugu uko ari 6 bizakira bizahita binahabwa itike yo kugikina.

Nk'uko byari byitezwe Arabia Saudite ni cyo gihugu cyemejwe ko kizakira igikombe cy'Isi cya 2034 dore ko n'ubundi ari cyo gihugu cyoyine cyari cyaratanze ubu busabe. 

Bivuze ko kuva amakipe y'ibihugu akina imikino y'igikombe cy'Isi agizwe 48, Arabia Saudite ni cyo gihugu kizaba cyakiriye igikombe cy'Isi ari kimwe dore ko n'icya 2026 kizabera mu bihugu bitatu ari byo Leta Zunze Ubumwe za Amerika, Canada na Mexico.

Igikombe cy'Isi giheruka cyabereye muri Qatar kikaba cyaregukanwe n'ikipe y'igihugu ya Argentine itsinze u Bufaransa ku mukino wa nyuma.